საპარლამენტო უმრავლესობის წევრის, თამაზ მეჭიაურის განცხადებით, თუ საქართველო სამხრეთ ოსეთისა და აფხაზეთის დაბრუნებაზე უარს არ იტყვის, ის NATO-ში ვერ შევა. დეპუტატის თქმით, საქართველოს ჩრდილოატლანტიკურ ალიანსში გაწევრიანებას დღევანდელი მოცემულობით, ოკუპირებულ რეგიონებთან დაკავშირებული პრობლემების გათვალისწინებით, მხარს არ უჭერს:

"თუ ჩვენ მოვითხოვთ ნატოსგან, რომ დაგვიბრუნოს სამხრეთ ოსეთი და აფხაზეთი, ამით მან, ფაქტობრივად, უნდა გადადგას ის ნაბიჯი, რომ რუსეთს ომი გამოუცხადოს. მითხარით, რომელი ქვეყანა არის ამისთვის მზად. ამერიკის ელჩი თვითონ ნატოში ამბობს, რომ უახლოეს პერიოდში ნატოს გაფართოება არ იგეგმება".

ჟურნალისტის შეკითხვას, ემხრობა თუ არა მეჭიაური, რომ საქართველომ რუსეთისგან იარაღი იყიდოს, დეპუტატმა უპასუხა, რომ თუ ამის საჭიროება შეიქმნება, მნიშვნელობა არ აქვს, საქართველო ვისგან იყიდის იარაღს:

"ბოდიში, საქართველოს მოქალაქეები ხართ თუ ნატოსი? ვინც გამოადგება, რომელიც გამოადგება ამ საქმეს, მე ნებისმიერთან უნდა ვითანამშრომლო".

შეკითხვაზე, რამდენად ეფექტიანი იქნება ოკუპაციასთან რუსეთის იარაღით ბრძოლა, დეპუტატმა უპასუხა:

"ვერც ამერიკული იარაღით ვერ დაამარცხებ რუსეთს და ვერც რუსული იარაღით".

მეჭიაურის კომენტართან დაკავშირებით პარლამენტის თავდაცვისა და უშიშროების კომიტეტის თავჯდომარემ, ირაკლი სესიაშვილმა განაცხადა, რომ მსგავსი, ცალკეული დეპუტატების აზრი, საქართველოს არჩევანზე გავლენას ვერ მოახდენს:

"ეს არის მტკიცე, ემყარება ჩვენი ხალხის, ჩვენი მოსახლეობის არჩევანს. ეს ემყარება ჩვენს წარსულს, ჩვენს მენტალიტეტს, ტრადიციებს და აქ კითხვის ნიშნები არ არსებობს".

საპარლამენტო უმრავლესობის წევრის, მანანა კობახიძის აზრით კი, ნებისმიერ დეპუტატს უფლება აქვს თავისი ინდივიდუალური აზრი დააფიქსიროს:

"გითხარით, რომ დიახ, საფრთხე, როდესაც 20% რუსეთს აქვს ოკუპირებული, მომდინარეობს რუსეთისგან. ეს არის ფაქტი. თქვენ თუ გინდათ თქვათ ის, რომ საფრთხე არ არის, ეს იქნება, როგორც საკუთარი თავის, ისე საზოგადოების მოტყუებაც".

"შემაშფოთებელი და საზიანო საქართველოს უსაფრთხოებისათვის" - ასე შეაფასა მეჭიაურის განცხადება ერთიანი ნაციონალური მოძრაობის წევრმა, სერგო რატიანმა. მისი თქმით, როდესაც უმრავლესობის ერთ-ერთი ლიდერი მსგავს განცხადებას აკეთებს, გამოდის, რომ საქართველოს არ ჰყავს ხელისუფლება, რომელიც ქვეყნის ინტერესებს იცავს:

"ეს არის ანტიდასავლური განცხადება".

თავისუფალი დემოკრატების წევრს, ირაკლი ალასანიას კი მიაჩნია, რომ საქართველოს მოსახლეობის 70%-ზე მეტი მეჭიაურისგან განსხვავებულად ფიქრობს. მისი თქმით, ნატო ყველაზე წარმატებული პოლიტიკური ალიანსია და მისკენ სვლა საქართველოს უსაფრთხოებას ხელს შეუწყობს.