გირჩის ლიდერი, იაგო ხვიჩია ამბობს, რომ ქართული ოცნება ყველას აბრალებს ნაციონალობას, მათ შორის მათ, ვინც რამდენიმე თვის წინ მათი თანაგუნდელი იყო. მას არ უკვირს, რომ მმართველი პარტიის გენერალურ მდივანი, კახა კალაძე ნაციონალებად მოიხსენიებს ყველა ოპონენტს.

"ამ განმარტებით, ყველაფერი, რაც მოძრაობს, არის ნაციონალი მეც ნაციონალი ვარ, შენც ნაციონალი ხარ, აი, ძაღლი რომ წევს, ისიც ნაციონალია. რა ვქნათ ახლა? ვართ ასეთი განმარტებით ნაციონალები ბიძინა ივანიშვილის წინააღმდეგ", — განაცხადა იაგო ხვიჩიამ.

ის გამოეხმაურა ხელისუფლების იმ რიტორიკასაც, რომელიც აქციაზე მყოფ ხალხის რაოდენობას შეეხებოდა:

"ხალხი ეცოტავათ გუშინ, ეცოტავათ ამერიკის საელჩოს და ევროკავშირის განცხადება ღამის 12 საათზე. არ ესმით ამის კონტექსტი. ან მეორე ვარიანტია, უბრალოდ, რუსულ თამაშს თამაშობენ".

დღეს, 18 ნოემბერს კახა კალაძემ ბრიფინგი გამართა და ყველა იმ ადამიანს, რომელიც ბიძინა ივანიშვილის დაპირების შეუსრულებლად დატოვებას აპროტესტებს, ნაციონალი უწოდა. სწორედ ამ დაპირების შეუსრულებლობის გამო პარტია დატოვა პარლამენტის 13-მა წევრმა და თბილისში დაიგეგმა აქციები.

ამ წუთებში პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და დააწყვეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.