ქართული ოცნების დეპუტატი, ირაკლი კობახიძე, აქციის მონაწილეების მოთხოვნას, ე.წ. გერმანული მოდელით ჩატარდეს პროპორციული არჩევნები, გამორიცხავს. ის განმარტავს, რომ მსგავსი ჩანაწერი საქართველოს კონსტიტუციაში არ არის.

"გერმანულ მოდელზე 2016 წელზეც იყო საუბარი. იგი არ არის თავსებადი ჩვენს კონსტიტუციასთან. ამაზე მსჯელობა შეუძლებელია სამართლებრივი მიზეზით. გერმანული მოდელი ითვალისწინებს იმას, რომ პროპორციული წესით ნაწილდება 150-ვე მანდატი და ჩვენს კონსტიტუციაში გვიწერია, რომ 77 დეპუტატი აირჩევა პროპორციული წესით".

ირაკლი კობახიძე "ნონსენსს" უწოდებს იურისტების მიერ გაჟღერებულ იდეასაც, რომ კონსტიტუციი გადასინჯვის წესით, 101 ხმით პროექტის განხილვის გაგრძელება შეიძლება.

ახალგაზრდა იურისტთა ასოციაციის კონსტიტუციონალისტის, ვახუშტი მენაბდის განმარტებით, სულ მცირე 2/3-ის, ანუ 100 დეპუტატის მხარდაჭერის შემთხვევაში საჭიროა ორი მოწვევის პარლამენტის ჩართულობა. მოქმედმა პარლამენტმა კანონპროექტს სამჯერ უნდა დაუჭიროს მხარი, ახალმა მოწვევამ კი ერთხელ. ყველა კენჭისყრაზე კი სულ მცირე 100 დეპუტატის მხარდაჭერაა აუციელებელი.