კომიქსის სამყაროს ფანების ნაწილი ტოდ ფილიპსის ჯოკერს თავიდანვე იმის გამო იწუნებდა, რომ ფილმი საკმარისად არ ჰგავდა კომიქსის გმირებზე გადაღებულ ტრადიციულ კინოს. თუმცა, ჯოკერი სხვა ბევრ მსგავსი თემატიკის ფილმთან შედარებით გაცილებით წარმატებული აღმოჩნდა: მისმა შემოსავლებმა უკვე ერთ მილიარდ დოლარს მიაღწია.

ეს რეკორდული მაჩვენებელია R-კატეგორიის კინოსურათისთვის — ფილმი, რომლის კინოთეატრში ნახვა ძალადობრივი სცენებისა თუ უცენზურო ლექსიკის გამო ჩვიდმეტ წლამდე მოზარდებისთვის შეზღუდულია. ამის მიუხედავად ჯოკერმა მოახერხა და ჯერ Deadpool-ის რეკორდი გააუმჯობესა, ახლა კი პირველი მსგავსი ტიპის ფილმი გახდა, რომლის შემოსავლებმაც მილიარდ დოლარს გადააჭარბა.

თუ გავიხსენებთ იმას, რომ ფილმის ბიუჯეტი $62.5 მილიონი იყო, მაშინ ჯოკერი ერთ-ერთ ყველაზე წარმატებულ და ფინანსურად მომგებიან პროდუქტად შეგვიძლია შევაფასოთ. თანაც ეს ყველაფერი იმის გათვალისწინებით, რომ ფილმს ჯერ კიდევ პრემიერამდე აკრიტიკებდნენ საფრთხის შემცველი შინაარსობრივი დეტალების გამო.

ამ ყველაფერთან ერთად წინ გველოდება ისეთი მნიშვნელოვანი დაჯილდოებები, როგორებიცაა ოქროს გლობუსი და ოსკარები, სადაც, დარწმუნებით შეგვიძლია ვთქვათ, რომ ტოდ ფილიპსის ჯოკერი შეუმჩნეველი არ დარჩებათ, რაც ამ ფილმის წარმატებას კიდევ უფრო გაზრდის.