ადგილობრივი მედიის ცნობით, საფრანგეთის სამხრეთ-დასავლეთ სანაპიროების ნაწილი მას შემდეგ დაიხურა, რაც ზღვამ 1000 კილოგრამამდე კოკაინი გამორიყა.

უკვე რამდენიმე დღის განმავლობაში საფრანგეთის სანაპირო ზოლის სხვადასხვა ნაწილში დიდი ოდენობით კოკაინის შეფუთვები აღმოაჩინეს, რის გამოც პოლიციამ გადაწყვიტა მთლიანად დაეხურა სანაპირო, რადგან ის შემთხვევით დამსვენებლების ხელში არ აღმოჩენილიყო. თანაც გამომძიებლები უფრო დეტალურად სწავლობენ ზღვისპირს, რათა არსებობის შემთხვევაში დაუყონებლივ იპოვონ კოკაინის ახალი შეფუთვები.

პოლიციის განცხადებით, სანაპიროდან ამოღებულ შეფუთვებში მაღალი ხარისხის კოკაინი აღმოჩნდა, რომელიც ადამიანის ორგანიზმისთვის განსაკუთრებულად საშიშია, რადგან მსგავსი ნივთიერებით ორგანიზმის ინტოქსიკაციის რისკი ძალიან მაღალია.

ფოტო: AFP

ამჟამად სანაპირო ზოლს ასამდე გამომძიებელი შეისწავლის და ისინი ყოველდღიურად დაახლოებით ასი კილოგრამის ოდენობის კოკაინს პოულობენ, ბოლო მონაცემებით კი უკვე 1 010 კგ ნარკოტიკული საშუალება აღმოაჩინეს.

ამ ფაქტთან დაკავშირებით გამოძიება ჯერ არ დასრულებულა და ოფიციალური ინფორმაციაც ამ მოვლენის ასახსნელად ჯერ ცნობილი არ არის, თუმცა, როგორც ვარაუდობენ, ზღვაში ტვირთის გადატანის დროს ნარკომოვაჭრეები შტორმში მოყვნენ და ეს უკანონო პროდუქცია ზღვაში დაკარგეს, შემდეგ კი ის სანაპიროზე გამოირიყა.

ევროკავშირის ნარკოტიკული საშუალებების მონიტორინგის ცენტრის ცნობით, პოლიციამ მარტო 2017 წელს ევროპაში 140 ტონა კოკაინი ამოიღო, მათ შორის ყველაზე მეტი ესპანეთსა და ბელგიაში. სტატისტიკა ცხადყოფს, რომ ამ კუთხით ბოლო ათი წელია მდგომარეობა საგანგაშოდ გაუარესებულია.