აღმოსავლეთ პარტნიორობის მედია კონფერენცია, რომელიც ეკონომიკურ მდგრადობას განიხილავს, განსაზღვრავს დონორების მომავალ მხარდაჭერას

"აღმოსავლეთ პარტნიორობის მედია კონფერენცია 2019: ბიზნესი და მდგრადობა" 13-14 ნოემბერს ლატვიაში, ქალაქ რიგაში იმართება.

კონფერენციაში, რომელიც ორგანიზებული ევროკომისიის მიერ საგარეო საქმეთა ევროპული სამსახურის და ლატვიის მთავრობის მხარდაჭერით, მონაწილეობას მიიღებს 100-ზე მეტი მედია-პროფესიონალი, მედიის განვითარების ორგანიზაცია და დონორი პარტნიორი ქვეყნებიდან და ევროკავშირიდან.

ეს კონფერენცია წარმოადგენს აღმოსავლეთ პარტნიორობის მეორე მედია კონფერენციის გაგრძელებას, რომელიც ჩატარდა 2017 წელს და განსაზღვრა ეკონომიკური მდგრადობა, როგორც პროფესიული ჟურნალისტიკის წინაშე მდგარი ძირითადი გამოწვევა მთელ რეგიონში.

კონფერენციას გახსნის მეთიუ ბუსკე, საქართველოს, მოლდოვის და სამეზობლოს სახელმწიფოთაშორისი თანამშრომლობის განყოფილების ხელმძღვანელი სამეზობლოს და გაფართოების საკითხებზე მოლაპარაკებების გენერალურ დირექტორატში, ევროკომისია; რადოსლავ დარსკი, აღმოსავლეთ პარტნიორობის, ცენტრალური აზიის და ეუთოს საკითხებში საგარეო საქმეთა ევროპული სამსახურის ხელმძღვანელის მოადგილე და ანდრის პელში, ლატვიის საგარეო საქმეთა სამინისტროს სახელმწიფო მდივანი.

პირველი სამუშაო სესია განიხილავს მედიის საჭიროებების შეფასების კომპლექსურ კვლევას, რომელიც ევროკომისიის შეკვეთით აღმოსავლეთ პარტნიორობის ქვეყნებში ჩატარდა.

შემდეგ მედია პროფესიონალები აღმოსავლეთ პარტნიორობის თითოეული ქვეყნიდან წარმოადგენენ შემთხვევების განხილვას, რომლებიც აშუქებს მათი ორგანიზაციების მიერ წარმატებული ბიზნეს-მოდელების შემუშავებას და საკუთარი ფინანსური სტაბილურობის გაუმჯობესებას. კონფერენციაზე On.ge ერთ-ერთ წარმატებულ მაგალითად იქნება ნაჩვენები, პრეზენტაციას კი აღმოსავლეთ პარტნიორების წარმომადგენლების წინაშე On.ge-ის დირექტორი, ანინა ტეფნაძე წარადგენს.

ბოლო სესია დაეთმობა დონორებს, რომლებიც განიხილავენ საკუთარ საქმიანობას აღმოსავლეთ პარტნიორობის ქვეყნებში და საკუთარ სტრატეგიებს დამოუკიდებელი საინფორმაციო სააგენტოების განსხვავებული საჭიროებების დასაკმაყოფილებლად რეგიონში.

კონფერენცია დასრულდება საბოლოო სესიით, რომელიც შეაჯამებს ღონისძიების შედეგებს და რეკომენდაციებს.

აღნიშნული ხელს შეუწყობს მედიის სამომავლო დახმარების განსაზღვრას აღმოსავლეთ პარტნიორობის ქვეყნებში.