მმართველი გუნდის დეპუტატი, დიმიტრი ხუნდაძე, რომელმაც გუშინ, 13 ნოემბერს საპარლამენტო უმრავლესობის სხდომა მოითხოვა, აცხადებს, რომ "ბატონ ბიძინა ივანიშვილთან დაპირისპირებას არ აპირებს". ხუნდაძის განცხადებით, მისი მიზანია, გუნდი დაარწმუნოს, რომ პროპორციულ სისტემაზე გადასვლის გადაწყვეტილება საფრთხისშემცველია. ამის შესახებ მან ქართული ოცნების ოფისთან განაცხადა, სადაც სხდომა იწყება.

"მე მასთან მაკავშირებს უფრო დიდი ხნის ნაცნობობა, ვიდრე პოლიტიკური ცხოვრების რამდენიმე წელია", — ამბობს ხუნდაძე.

ხუნდაძის თქმით, არ შესრულდა ორი პირობა, რომლის გამოც კომპრომისზე წავიდა და დათანხმდა ამ კანონპროექტს:

"პირველი, 2024 წელს უნდა გადავსულიყავით პროპორციულზე და მე მაშინაც ვხედავდი წინააღმდეგობას და ვასაბუთებდი. მაშინ იყო პირობა ის, რომ გადავიდეთ 2024 წელს და მანამდე შეძლებთ, რომ თვითმმართველობა იყოს რეალურად თვითმმართველი და ძლიერი. ეს პირობა ავტომატურად ვერ შესრულდა იმიტომ, რომ 2020-ში დაიგეგმა გადასვლა პროპორციულზე. მეორე პირობა, რომელიც 20-21 ფაზის შემდეგ იქნა მოცემული, თითქოს ამ გადაწყვეტილებით დამშვიდდებოდა ქუჩა, ოპოზიციური სპექტრი, საზოგადოების ის ნაწილი, რომელიც ქუჩაში იყო და განსაკუთრებით ის ნაწილი, რომელიც მხოლოდ და მხოლოდ დესტრუქციული ქმედებით იყო გამორჩეული. მე, რა თქმა უნდა, დავთმე და მაშინაც ვთქვი, რომ ჩემი გუნდის გადაწყვეტილებას ამ პირობით ვეთანხმები და მაშინა ვთქვი, რომ მაჟორიტარული სისტემა არის უფრო უპრიანი", — აღნიშნა ხუნდაძემ.

პროპორციულ წესზე გადასვლას პარლამენტმა კენჭი გუშინ, 12 ნოემბერს არ უყარა. პარლამენტის თავმჯდომარეს არ უთქვამს, რომ პროცესი გადაიდო, თუმცა, სხდომა კენჭისყრის გარეშე დაასრულა. კენჭისყრა, სავარაუდოდ, 13 ნოემბერს გაიმართება. მანამდე უმრავლესობის სხდომა ჩაინიშნა, სადაც ეს საკითხი განიხილება.

საკონსტიტუციო ცვლილებას მხარს უჭერდნენ ნაციონალური მოძრაობა და ევროპული საქართველო. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: