დეპუტატმა, გიორგი გაჩეჩილაძემ განაცხადა, რომ ოპოზიციის ქცევა "აღვირახსნილი პოპულიზმია", რაც მოსაბეზრებელი გახდა. მან მოუწოდა ოპოზიციას მაგნიტოფონზე ჩაწერონ ერთი გამოსვლა და ნებისმიერ თემასთან დაკავშირებით ის ატრიალონ.

"ოღონდ არ გამორჩეთ, რომ ყოველი სამი წინადადების შემდეგ ბიძინა ივანიშვილი ახსენონ. ასეთი დავალება აქვთ მათ თავისი არაფორმალური მმართველისგან, სააკაშვილისგან", — განაცხადა მან პლენარულ სხდომაზე.

დღევანდელ პლენარულ სხდომაზე, პროპორციული საარჩევნო სისტემის განხილვისას, გედევან ფოფხაძემ დაჩი ბერაიას აგინა, "დაბრედით" დაემუქრა" და თქვა, რომ "ყ*ეზე კიდია კონსტიტუცია". შემდეგ კი კობა ლურსმანაშვილმა და ლევან გოგიჩაიშვილმა იკამათეს და გოგიჩაიშვილმა მას ნაძირალა უწოდა.

ადა მარშანიამ განაცხადა, რომ ეს დაპირისპირება ჯანსაღი პროცესია, მთავარია "სწორად დასრულდეს". პასუხად პარლამენტის თავმჯდომარემ აღნიშნა, რომ დაპირისპირების დასასრულებლად მზად იყო დეპუტატები პიტნის ჩაიზე დაეპატიჟებინა.

დღეს, 12 ნოემბერს პარლამენტში პროპორციულ საარჩევნო სისტემას განიხილავენ. საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

გაიგე მეტი: