შინაგან საქმეთა სამინისტროს მიერ გავრცელებული ინფორმაციით, ტრანსგენდერი ქალის განზრახ მკვლელობის მცდელობის ბრალდებით, 1985 წელს დაბადებული, წარსულში ნასამართლევი, ამჟამად პირობითი მსჯავრის ქვეშ მყოფი პირი დააკავეს.

უწყების მტკიცებით, ბრალდებულმა მიმდინარე წლის 14 სექტემბერს, ორთაჭალაში, ურთიერთშელაპარაკების ნიადაგზე, ბლაგვი საგნითა და ცივი იარაღით მრავლობითი ჭრილობა მიაყენა მოქალაქეს და შემთხვევის ადგილიდან მიიმალა.

შსს-ს ცნობით, სამართალდამცველებმა ბრალდებული რუსთავში დააკავეს, დაკავებული კი ჩადენილ დანაშაულს აღიარებს.

გამოძიება განზრახ მკვლელობის მცდელობის ფაქტზე მიმდინარეობს.

ტრანსგენდერი ქალის ცემის ფაქტის გასაპროტესტებლად და სიძულვილით მოტივირებულ დანაშაულების პრევენციის მიზნით ქმედითი ზომების გატარების მოთხოვნით, შსს-ს შენობასთან დღეს, 16 ოქტომბერს აქცია გაიმართა.