ქართული ოცნების დეპუტატი, დიმიტრი ხუნდაძე მართლმადიდებელი ეკლესიის საპატრიარქოში შექმნილ კრიზისს ნაციონალურ მოძრაობას აბრალებს და აცხადებს, რომ "ნაცმოძრაობა თავის დანაყოფებთან ერთად ყველაფერზე მიდის". დღეს, 12 ნოემბრის სხდომაზე პოლიტიკური განცხადებების დროს დიმიტრი ხუნდაძემ ტელეწამყვანი, გიორგი გაბუნიაც ახსენა, რომ "საზოგადოება ვერასოდეს მიეჩვევა მის ბილწსიტყვაობას".

"გახსოვთ ალბათ ღვისმშობელზე ფეხით შედგომა, რამდენიმე დღის წინ ამ მართლაც ჯოისტიკმა, შეურაცხყოფა მიაყენა კიდევ ერთხელ საზოგადოებას", — თქვა ხუნდაძემ გიორგი გაბუნიაზე, რომელმაც რამდენიმე დღის წინ მღვდელი სექსუალურ შევიწროებაში დაადანაშაულა და თქვა, რომ "წლების წინ სასულიერო პირმა მისი ერთი ადგილი ჯოისტიკივით დაიჭირა".

ხუნდაძე ეკლესიის დისკრედიტაციაში ადანაშაულებს მიხეილ სააკაშვილს, გიგა ბოკერიას, ჭყონდიდის ყოფილ მიტროპოლიტ პეტრე ცაავას და აცხადებს, რომ ისინი 16 წელია ებრძვიან "საზოგადოების ფუნდამენტურ საყრდენს".

"გახსოვთ, ალბათ, ეკლესიებზე სატვირთოებით განხორციელებული შეტევა. თავისუფლების ინსტიტუტისა და ბოიკერიას ყოველდღიური დისკრედიტაცია ეკლესიისა. ახალაიების პირადი მძღვარის, კარის მოძღვრის პეტრეს პატრიარქზე გალაშქრება. მას მიხეილ სააკაშვილი ღირსეულ კაცად აღიარებს. თქვენ არ ინდობთ არც საეკლესიო კაბას, არ ინდობთ ჩოხას და სულში აფურთხებთ საზოგადოებას... ის შეცდომა, რაც დაუშვით კოჰაბიტაციის, ამას უნდა ჰქონდეს დასასრული", — ამბობს ხუნდაძე.

10 ნოემბერს ტელეწამყვანმა გიორგი გაბუნიამ პოსტფაქტუმის პირდაპირ ეთერში სასულიერო პირი სექსუალურ შევიწროებაში დაადანაშაულა. ის არ ამხელს, თუ სად მოხდა შემთხვევა და ვინ იყო ის სასულიერო პირი.

31 ოქტომბერს გამართული სინოდის სხდომის დასრულების შემდეგ მეუფე პეტრე ცაავამ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით მანვე აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი".