მარგვეთის ეპარქიის ყოფილი მღვდელმთავრის, ქრისტეფორე წამალაიძის შვილი, ეპისკოპოსი იასონ წამალაიძე გარდაიცვალა. შესაბამისი ინფორმაცია On.ge-ს შინაგან საქმეთა სამინისტროში დაუდასტურეს.

გარდაცვლილი ეპისკოპოსი იასონი სამგორში, მეტრომშენის დასახლებაში, მსოფლიო პატრიარქის დაქვემდებარებულ ეკლესიაში მსახურობდა.

ქრისტეფორე წამალაიძე ის სასულიერო პირია, რომელიც რამდენიმე დღის წინ მედიასთან საუბარში აცხადებდა, რომ საჭიროა, საერთო საეკლესიო კრებისა და არა სინოდის კრების მოწვევა, ეკლესიაში არსებული პრობლემების განსახილველად.

ნეტგაზეთთან საუბარში ქრისტეფორემ დაადასტურა სინოდის წევრის, წილკნისა და დუშეთის მთავარეპისკოპოს ზოსიმეს მიმართ ბრალდება სეექსუალურ შევიწროებაზე. იგი თბილისის სასულიერო აკადემიის სტუდენტის მიმართ სექსუალურ შევიწროებაში მართლმადიდებელმა მღვდელმა გიორგი სხილაძემ დაადანაშაულა. ეპისკოპოსი ზოსიმე ბრალდებას ცილისწამებას უწოდებს.

ქრისტეფორე (ომარ) წამალაიძე ილია მეორემ 1980 წელს ქორეპისკოპოსადაც დანიშნა. მისი საკითხი სინოდმა პირველად მრევლის საჩივრის გამო 1995 წელს განიხილა, წლების შემდეგ კი მღვდელმსახურება საერთოდ შეუჩერდა.