ბიძინა ივანიშვილი ფიქრობს, რომ ბერას მიერ ამაზონის ჯუნგლების დახმარების სურვილი და საზოგადოების ნაწილის კრიტიკა კომენტარის ღირსიც კი არ არის. ივანიშვილის თქმით, მისი შვილის ნაბიჯი "სიკეთისა და ბოროტების მიღმაა" და კრიტიკაზე ყურადღების გამახვილება "მათ დონეზე დასვლა" იქნება.

თუმცა, ქართული ოცნების თავმჯდომარემ ეს საკითხი მაინც განიხილა და თქვა, რომ კრიტიკოსებმა თავი შეირცხვინეს, როდესაც თბილისის სტიქიისა და ბორჯომ-ხარაგაულის ხანძრის ლიკვიდაციის მაგალითები მოიყვანეს.

"თითქოს ყურადღება დავაკელი ამ პრობლემას. სინამდვილეში, ხანძრის შედეგად დაზიანებული ტყის აღდგენის, ანუ ახალი განაშენიანების პროცესში არათუ ჩართვის, არამედ მთლიანად საკუთარ თავზე აღების მზადყოფნა პირველი დღეებიდანვე გამოვხატე. თუმცა ამის აფიშირება არ მომიხდენია, რადგან არ არის ეს ჩემი სტილი და ხელწერა", — განაცხადა მან Entrepreneur-თან ინტერვიუში.

ბერა ივანიშვილის მიერ "მსოფლიოს ფილტვების" გადასარჩენად გადარიცხული 1,1 მლნ დოლარი სოციალურ ქსელებსა და პოლიტიკურ წრეებში კრიტიკის მიზეზი გახდა. ბერამ აღნიშნა, რომ თანხის ნაწილი მისი დანაზოგია, ნაწილი კი ოჯახის "შეწირულობაა". მან ყველას მოუწოდა "მოქმედებისკენ". ამ რჩევამ და იმ ფაქტმა, რომ მმართველი პარტიის თავმჯდომარის შვილი სხვა ქვეყნის პრობლემების მოსაგვარებლად იბრძვის, კრიტიკა გამოიწვია.

მმართველ პარტიაში მსგავსი რეაქცია არაადეკვატური ჰგონიათ. ისინი კრიტიკას მიუღებელს უწოდებენ და იმ საკითხებზე საუბრობენ, რაც ივანიშვილების ოჯახმა საქართველოსთვის გააკეთა.

ამავე თემაზე: