თეოლოგი ბექა მინდიაშვილი აცხადებს, რომ საპატრიარქო სინოდის ყველა წევრმა, პირველ რიგში კი პატრიარქმა უნდა დატოვოს. ამის შესახებ მან ინტერპრესნიუსს განუცხადა.

მისი თქმით, საპატრიარქო კოლაფსის წინაშე დგას და ამაზე სინოდის ყველა წევრმა თავისი პასუხისმგებლობა უნდა გააცნობიეროს.

"მათ უნდა გააცნობიერონ, რომ ამ ფორმით ვეღარ მართავენ ეკლესიას, აღარ იმსახურებენ მრევლის ნდობას და უნდა წავიდნენ თავ-თავიანთ მონასტრებში. ეს არის ამ სიტუაციიდან გამოსავალი. ჩვენ დავინახეთ, რომ წლების განმავლობაში, ამ ფორმით ეკლესიის მართვამ მიიყვანა ერთი მხრივ საპატრიარქო, ეკლესიის ადმინისტრაცია, კოლაფსამდე და მეორე მხრივ, უზარმაზარი დარტყმა მიაყენა ქართულ სახელმწიფოებრიობას, რამდენადაც მისცა ხელისუფლებას ეკლესიის შიდა საქმეებში ადმინისტრაციული ჩარევის უფლება, რაც ამოვიკითხეთ იაკობის მონათხრობიდან", — ამბობს თეოლოგი.

მისივე თქმით, ამ პროცესებზე პასუხისმგებელი პატრიარქია.

"უნდა დატოვოს ყველამ საპატრიარქო, ყველას ვგულისხმობ და პირველ რიგში პატრიარქს. თვითონაა პასუხისმგებელი, რა თქმა უნდა. ეს არ არის ერთი დღის საქმე. ეს არის ჩემი სურვილი, თუმცა, სამწუხაროდ ამას ახდენა არ უწერია. ყველაზე რეალური გამოსავალი ეს იქნებოდა. ისინი ვერ მართავენ ეკლესიას და უფსკრულის წინ დააყენეს, ერთი ნაბიჯია უფსკრულამდე თუ უკვე უფსკრულში არ არის გადაჩეხილი", — აღნიშნა მან.

დღეს, 31 ოქტომბერს მეუფე პეტრემ საპატრიარქოს დატოვების შემდეგ თქვა, რომ ილია მეორე პიდარასტიის, მამათმავლობის ცოდვითაა შეპყრობილი". მისივე თქმით, მამათმავლობის მხილების გამო პატრიარქმა ის მღვდელმთავრობიდან გადააყენა.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.