საერთაშორისო ფინანსურმა გამოცემამ, Global Finance-მა, პირველად ისტორიაში, თიბისის მობაილბანკი სამომხმარებლო ციფრულ ბანკებს შორის მსოფლიოში საუკეთესო მობაილბანკად აღიარა.

ჯილდო ბანკმა 2019 წელს საუკეთესო ციფრული შესაძლებლობებისა და უახლესი ტექნოლოგიების მუდმივი განვითარებისთვის მიიღო.

"ჩვენთვის დიდი პატივია Global Finance-ის აღიარება. ეს ჯილდო კიდევ ერთხელ ხაზს უსვამს ჩვენი გუნდის თავდაუზოგავ მუშაობას, რომელიც მუდმივად ცდილობს შესთავაზოს მომხმარებლებს მათ საჭიროებებზე მორგებული ინოვაციური ციფრული მომსახურება და პროდუქტები", — განაცხადა ვახტანგ ბუცხრიკიძემ, თიბისი ბანკის გენერალურმა დირექტორმა.

"ამ წლის გამარჯვებულები ძლიერი სტრატეგიის მიხედვით გამოვავლინეთ, რომლის ფარგლებში ისინი მომხმარებლებს ინოვაციურ ციფრულ სერვისებს და მრავალფეროვან პროდუქტებს სთავაზობენ და მუდმივად ზრდიან ონლაინ მომხმარებლების რაოდენობას", — განაცხადა Global Finance-ის რედაქტორმა და გამომცემელმა, ჯოზეფ ჯარაპუტომ.

საერთაშორისო ფინანსური ჟურნალი Global Finance 1987 წელს დაარსდა და ის 50 000-ზე მეტი ტირაჟით მსოფლიოს 188 ქვეყანაში გამოიცემა. Global Finance-ის მკითხველებს წარმოადგენენ ფინანსური ინსტიტუტების წარმომადგენლები, რომლებიც პასუხისმგებლები არიან საინვესტიციო და სტრატეგიული გადაწყვეტილებების მიღებაზე.

"Global Finance-ს მობაილბანკის შესაფასებლად მრავალი კრიტერიუმი გააჩნია — ფუნქციები, შეთავაზებები, ინოვაციური მიდგომები, უსაფრთხოება და სხვა. გამოცემამ თიბისის მობაილბანკი საუკეთესოდ სწორედ ამ კრიტერიუმების შეჯამების საფუძველზე დაასახელა. თიბისის მობაილბანკი ყველაზე თანამედროვე, კომფორტული და მოსახერხებელი აპლიკაციაა, რომელიც ადამიანებს აძლევს საშუალებას, რომ ბანკის სერვისებით მაქსიმალურად სწრაფად, სახლიდან გაუსვლელად ისარგებლონ. აპლიკაცია მომხმარებლებზე მაქსიმალურადაა მორგებული, იქნება ეს ხმოვანი ბრძანებები, დიზაინის ენა თუ სხვადასხვა ოპერატიული სისტემების მხარდაჭერა", – აცხადებს პროექტის ხელმძღვანელი გიორგი ვახტანგიშვილი.

Global Finance უკვე 20 წელზე მეტია ასახელებს მსოფლიოს საუკეთესო ბანკებს სხვადასხვა ნომინაციაში. წლების განმავლობაში, თიბისი ბანკს Global Finance-ისგან სხვადასხვა კატეგორიაში არა ერთი ჯილდო აქვს მიღებული.