პატრიოტთა ალიანსის დეპუტატმა, ემზარ კვიციანმა პარლამენტში მოსმენაზე მყოფ უზენაესის მოსამართლეობის კანდიდატს ჰკითხა, როგორ შეიძლება ცილისწამება სიტყვის და გამოხატვის თავისუფლება იყოს. მანვე იკითხა, რამდენად არის დაცული ბავშვთა უფლებები, როცა მის მშობლებს ცილს სწამებენ.

"შეიძლება ადამიანს თოფი ესროლო, მაგრამ ასცდეს მას და გადარჩეს, მაგრამ ცილისწამება არამარტო ერთ ადამიანს, არამედ მის ოჯახს ხვდება მთლიანობაში", — განაცხადა დეპუტატმა.

კანდიდატმა ლალი ფაფიაშვილმა მას უთხრა, რომ ესმის გულისტკივილი, მაგრამ რეაგირებისთვის ყოველთვის არ არის საჭირო სისხლის სამართლებრივი სანქციების გამოყენება. მისი თქმით, შესაძლოა, ბევრად უფრო ეფექტური იყოს იგივე პრობლემის სამოქალაქო სამართალწარმოებით დარეგულირება, როგორც ამას საქართველოს კანონმდებლობა ითვალისწინებს.