სახალხო დამცველის აპარატის ინფორმაციით, პროკურატურამ მათ სექსუალურ ძალადობაში ბრალდებული დეპუტატის, ილია ჯიშკარიანის საქმის მასალები არ გადასცა. ეს განცხადება აპარატმა ძალადობის სავარაუდო მსხვერპლთან, თამთა თოდაძესთან შეხვედრის შემდეგ გაავრცელა.

ომბუდსმენის ცნობით, მასალებზე წვდომა საქმის სრულყოფილი შესწავლის მიზნით ითხოვეს. მათივე ინფორმაციით, საკითხის სიმძიმიდან და მგრძნობელობიდან გამომდინარე, სახალხო დამცველი კიდევ ერთხელ მოუწოდებს პროკურატურას, საგამონაკლისო წესით დაუშვან აპარატისთვის საქმის მასალებზე წვდომა.

On.ge ამ საკითხზე პროკურატურას დაუკავშირდა და მათ კომენტარს მიღებისთანავე შემოგთავაზებთ.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

ილია ჯიშკარიანს პროკურატურამ ბრალი წარუდგინა. თბილისის საქალაქო სასამართლომ 10-ათასლარიანი გირაო შეუფარდა.