საქართველოს ეროვნული ბანკის გადაწყვეტილებით, თითქმის 102 700 სესხზე პროცენტი გაეზარდა. ამ საკითხზე მონეტარული პოლიტიკის კომიტეტმა დღეს, 2019 წლის 23 ოქტომბრის სხდომაზე იმსჯელა და რეფინანსების განაკვეთი 7,5 პროცენტიდან 8,5 პროცენტამდე გაზრდის გადაწყვეტილება მიიღო.

თუ არ გახსოვთ, არის თუ არა თქვენი სესხი რეფინანსირების განაკვეთზე მიბმული, შეგიძლიათ ჩახედოთ დადებულ ხელშეკრულებას, ან თავად სესხის გამცემ ორგანიზაციას ჰკითხოთ.

ეროვნული ბანკის ინფორმაციით, სესხზე პროცენტის გაზრდა ინფლაციის 6,4 პროცენტამდე გაზრდით არის განპირობებული.

"პროგნოზის მიხედვით, სხვა თანაბარ პირობებში, ინფლაცია მიმდინარე წელს მიზნობრივი დონის ზემოთ დარჩება, მომავალი წლის მარტიდან შემცირებას დაიწყებს, ხოლო საშუალოვადიან პერიოდში მიზნობრივ მაჩვენებელთან ახლოს შენარჩუნდება", — განმარტავენ ბანკში.