ე.წ. გავრილოვის ღამის ოთხი თვის თავზე ქართული ოცნების თავმჯდომარეს, ბიძინა ივანიშვილს თელაველებმა წითელი ბარათი უჩვენეს. საპროტესტო აქციაზე, რომელსაც მოძრაობა ქვეყნის სამსახურში მართავს, მოქალაქეებმა კიდევ ერთხელ შეახსენეს ივანიშვილს, რომ მომხდარ მოვლენებზე პასუხისმგებლობა მას ეკისრება.

ეს პირველი შემთხვევა არ არის, როდესაც ივანიშვილს საპროტესტო აქციაზე ბარათს უჩვენებენ. თავდაპირველად #სირცხვილიას აქტივისტებმა მას ყვითელი ბარათები უჩვენეს და ეს იყო გაფრთხილება. მას შემდეგ, რაც პროტესტი რამდენიმე თვე გაგრძელდა და შინაგან საქმეთა მინისტრი არ გადადგა ბარათი წითელი გახდა.

მიუხედავად იმისა, რომ თელავის მერიამ აქციის გამართვაზე აქტივისტებს უარი უთხრა, პროტესტმა მშვიდად ჩაიარა. აქციაზე სიტყვით გამოვიდნენ ადგილობრივი აქტივისტები და იმ პრობლემებზე ისაუბრეს, რომელიც კახეთშია.

მოძრაობა ქვეყნის სამსახურშის მომდევნო აქცია 20 ნოემბერს ზუგდიდში გაიმართება.

#სირცხვილიამ სამთვიანი უწყვეტი საპროტესტო აქცია 20 სექტემბერს შეწყვიტა. აქტივისტებმა მანიფესტი გაავრცელეს და განაცხადეს, რომ შექმნიდნენ და გააძლიერებდნენ აქტივისტთა მობილურ ჯგუფებს თბილისსა და რეგიონებში, რომლებიც "მოსვენებას არ მისცემდნენ ივანიშვილის ლაქიებს". ასევე, იურიდიულ მხარდაჭერას გაუწევდნენ გავრილოვის ღამის დაკავებულებსა და დაზარალებულებს, შექმნიდნენ ახალ მედიაპლატფორმებს. მათივე გეგმით, ყოველ 20 რიცხვში რეგიონებში საპროტესტო აქციები გაიმართება.