აშშ-ს ვიცე-პრეზიდენტი, მაიკ პენსი აცხადებს, რომ თურქეთი სირიაში ცეცხლის შეწყვეტას 120 საათით შეწყვეტს. ხუთი დღის განმავლობაში კი ქურთულმა ერთეულებმა უსაფრთხო ზონაში უნდა გადაინაცვლონ.

ამის შესახებ პენსმა თურქეთის პრეზიდენტთან, რეჯეპ ტაიპ ერდოღანთან შეხვედრის შემდეგ, პრესკონფერენციაზე განაცხადა. მისივე თქმით, ქურთული ერთეულების გაყვანა უკვე დაწყებულია.

პენსის განცხადებით, სასაზღვრო ზონიდან ქურთების გასვლის შემდეგ თურქეთი საბოლოოდ შეწყვეტს სამხედრო ინტერვენციას.

აღნიშნულ განცხადებას უკვე გამოეხმაურა აშშ-ს პრეზიდენტი, დონალდ ტრამპი:

"შესანიშნავი ამბები თურქეთიდან. მადლობა ერდოღანი. მილიონობით სიცოცხლე გადარჩება".

მაიკ პენსი სახელმწიფო მდივან მაიკ პომპეოსთან ერთად ანკარაში საგანგებო ვიზიტით დღეს, 17 ოქტომბერს ჩაფრინდა. ის თურქეთის პრეზიდენტს სწორედ სირიაში განვითარებულ მოვლენებზე ესაუბრა.

9 ოქტომბერს თურქეთმა სირიაში, სასაზღვრო ტერიტორიაზე სამხედრო მოქმედებები სირიელი ქურთების წინააღმდეგ დაიწყო. თურქეთის ხელისუფლება ამ ოპერაციას "მშვიდობის წყაროს" უწოდებს და მის მიზნად ქურთებისგან ტერიტორიის გათავისუფლებას ასახელებს.

ტერიტორიას, რომელზეც თურქეთს "უსაფრთხო ზონის" შექმნა სურს, სირიის დემოკრატიული ძალები (SDF) აკონტროლებს, რომლის შემადგენლობაში სახალხო თავდაცვის დანაყოფები (YPG) შედის.

სამხედრო ინტერვენცია მას შემდეგ დაიწყეს, რაც აშშ-მ ჯარების გაყვანის შესახებ განაცხადა. გადაწყვეტილება მოულოდნელი იყო, რადგან სირიელი ქურთები ისლამურ სახელმწიფოსთან ბრძოლაში აშშ-ს მთავარი მოკავშირეები იყვნენ.

თურქული ძალებისგან თავდასაცავად ქურთებმა დასახმარებლად სირიის სამთავრობო ძალებსა და რუსეთს მიმართეს. სირიამ თურქეთის სასაზღვრო ტერიტორიაზე ჯარების განთავსება დაიწყო, ხოლო რუსეთი თურქეთისა და სირიის სამხედრო ძალებს შორის პატრულირებს.

16 ოქტომბერს აშშ-ს კონგრესის წარმომადგენლობითმა პალატამ მხარი დაუჭირა რეზოლუციას, რომლითაც სირიიდან ჯარების გამოყვანა დაგმეს. რეზოლუციას მხარი დაუჭირეს არა მხოლოდ დემოკრატებმა, არამედ რესპუბლიკელებმაც.

ამავე თემაზე: