კომუნიკაციების კომისიამ 17 ოქტომბერს კავკასუს ონლაინი სამართალდამრღვევად ცნო და კანონდარღვევით გასხვისებული წილების პირვანდელ მდგომარეობაში დაბრუნება მოსთხოვა. კომპანიას ამისთვის სამკვირინია ვადა მისცეს. საქმე 2019 წლის აგვისტოში წილების გასხვისებას ეხება.

როგორც კომისია განმარტავს, ავტორიზებული პირი ვალდებულია 5 პროცენტზე მეტი წილის გასხვისების განზრახვის შემთხვევაში, კომუნიკაციების კომისიას მიმართოს და მისგან მიიღოს თანხმობა.

"კავკასუს ონლაინმა წილების გასხვისება კომისიის წინასწარი ინფორმირების გარეშე განახორციელა, რითაც მოქმედი კანონმდებლობა დაარღვია", — ნათქვამია განცხადებაში.

კომისიის განცხადებით, წილების გასხვისების, შერწყმის ან შესყიდვის დროს, მნიშვნელოვანია ავტორიზებულმა პირმა თანხმობისთვის მიმართოს კომისიას, რათა კომისიამ ბაზარზე არსებული მდგომარეობა შეისწავლოს და შეაფასოს, ესა თუ ის გადაადგილება ბაზარზე კონკურენციის კუთხით რაიმე გავლენას ხომ არ ახდენს.