საქართველოს ინფრასტრუქტურის მინისტრი, მაია ცქიტიშვილი ამბობს, რომ ანაკლიის კონსორციუმისთვის დოკუმენტების წარდგენისთვის ვადის წლის ბოლომდე გადაწევა "უნდა იყოს ბოლო შანსია". ამის შესახებ მინისტრმა რამდენიმე წუთის წინ ისაუბრა.

"ამ შემთხვევაში ჩვენ არ ვახანგრძლივებთ ვადას, ვადა გახანგრძლივებული იქნა 2019 წლის ივნისში წლის ბოლომდე. ამ ეტაპზე ამ განხანგრძლივებით ჩვენ გვქონდა დადგენილი შუალედური ვალდებულება 15 ოქტომბერამდე, რომელიც ვერ შესრულდა. იმის მიუხედავად, რომ ამ შეთანხმებით ჩვენ შეგვეძლო ხელშეკრულება შეგვეწყვიტა, ჩვენ ამ უფლებით არ ვისარგებლეთ", — ამბობს ცქიტიშვილი.

15 ოქტომბერს ანაკლიის განვითარების კონსორციუმის ხელმძღვანელმა ლევან ახვლედიანმა განაცხადა, რომ მთავრობამ ანაკლიის პროექტის "საბოტაჟირება მოახდინა" ბოლო რამდენიმე თვის და კვირის განმავლობაში. მისივე თქმით, მათ 10 ოქტომბერს ჩააბარეს დოკუმენტაცია, სადაც კონკრეტული ხედვები იყო წარმოდგენილი და ისინი დამატებით აღარანაირი დოკუმენტაციის ჩაბარებას აღარ აპირებენ.

ლევან ახვლედიანის თქმით, კულუარებში მთავრობამ არერთხელ დააფიქსირა პოზიცია, რომ "ანაკლია არაა რენტაბელური" ან "კომერციულად გამართლებული".

დოკუმენტაციის წარდგენის ვადის ამოწურვამდე რამდენიმე საათით ადრე ინფრასტრუქტურის მინისტრმა, მაია ცქიტიშვილმა ბრიფინგზე განაცხადა, რომ კონსორციუმის წარდგენილი დოკუმენტაცია მათთვის დამაკმაყოფილებელი არ არის.

ამავე თემაზე: