სულ ცოტა ხანია, რაც გავიგეთ, რომ კომიქსების სამყაროს ახალი ქალი-კატა ეყოლება: ზოი კრავიცი.

ფილმში, რომლის პრემიერაც 2021 წელსაა დაგეგმილი, ის ასევე ბეტმენის ახალი შემსრულებლის - რობერტ პატინსონის მეტოქედ მოგვევლინება. სანამ ამ საკმაოდ საინტერესო და გაბედული პროექტის საბოლოო შედეგს ვიხილავთ დიდ ეკრანებზე და შესაბამისადაც შევაფასებთ, მანამდე ლოდინის დრო როგორმე ხომ უნდა მოვკლათ?

ჰოდა, გთავაზობთ გავიხსენოთ ყველა ის მსახიობი, ვისაც აქამდე უკვე შეუსრულებია ქალი-კატის როლი, რათა შესაბამისი მოლოდინები გვქონდეს დიდი პატარა ტყუილების ვარსკვლავის, ზოი კრავიცის მომავალი როლის მიმართ.

ჯული ნიუმარი (1966-1967)

ქალი-კატა პირველად ეკრანებზე 60-იან წლებში გამოჩნდა, თანაც ტელეეკრანებზე: 1966 წელის ამერიკაში გადიოდა სერიალი ბეტმენი, რომელშიც ქალი-კატის როლი სწორედ ცნობილმა მსახიობმა და მომღერალმა, ჯული ნიუმარმა შეასრულა. ის ახლა 86 წლისაა და ხშირად ბეტმენზე გადაღებულ ანიმაციებში ქალი-კატის პერსონაჟს ახმოვანებს.

ერტა კიტი (1967-1968)

ბეტმენის სატელევიზიო შოუს ორ სეზონში მონაწილეობის შემდეგ ჯული ნიუმარი ქალი-კატის როლზე ახალმა მსახიობმა შეცვალა - ერტა კიტი. ის პირველი შავკანიანი ქალი იყო, ვინც ამ როლზე დაამტკიცეს, თუმცა ამ ფაქტისგან დამოუკიდებლადაც კიტიმ მოახერხა, რომ ყველასთვის დაემახსოვრებინა თავი კომიქსის ამ მნიშვნელოვანი გმირის საინტერესო და ექსპრესიული შესრულებით.

ლი მერივეზერი (1966)

სატელევიზო სამყაროსთან ერთად ქალი-კატა კინოშიც 60-იან წლებში გამოჩნდა. თანაც ეს საკულტო როლი 1966 წელს მის ამერიკამ, ლი მერივეზერმა შეასრულა.

მიშელ პფაიფერი (1992)

ალბათ, სულაც არ გადავაჭარბებთ შეფასებისას, თუ ვიტყვით, რომ მიშელ პფაიფერმა კომიქსების სამყაროში ერთ-ერთი ყველაზე სახასიათო და დასამახსოვრებელი პერსონაჟის სახე შექმნა. 1992 წელს ფილმში Batman Returns ქალი კატა სრულიად ახალი, უფრო თამამი და გაბედული პერსპექტივით ვიხილეთ.

ჰალი ბერი (2004)

2004 წელს ჰოლივუდში როგორც იქნა მიხვდნენ, რომ ქალი-კატა დამოუკიდებელ ფილმს იმსახურებდა, სადაც სწორედ მისი ისტორია იქნებოდა მოთხრობილი და რომელიმე სხვა გმირის სიუჟეტური დანამატი არ იქნებოდა.

ამ დავალების შესრულება ახლა უკვე მივიწყებულ, თუმცა თავის დროზე საკმაოდ მნიშვნელოვან მსახიობს, ჰალი ბერის დაეკისრა, რომელმაც დავალებას თავი შესანიშნავად გაართვა და ფილმი იმ წლის კინოგაქირავებაში ერთ-ერთი ლიდერიც გახდა.

ენ ჰეთეუეი (2012)

კინოინდუსტრიაში ბოლო ათწლეულის ნამდვილად ერთ-ერთი ყველაზე მნიშვნელოვანი მოვლენა კრისტოფერ ნოლანის მიერ ტრილოგიად გადაღებული ბეტმენის ისტორიაა. სწორედ ტრილოგიის ერთ-ერთ ფილმში, The Dark Knight Rises-ში 2012 წელს გამოჩნდა ქალი-კატა, რომლის როლიც ჰოლივუდის ერთ-ერთმა ყველაზე კაშკაშა ვარსკვლავმა, ენ ჰეთეუეიმ ითამაშა.

ისღა დაგვრჩენია, 2021 წელს ყველა ერთად დაველოდოთ და ზოი კრავიცის მიერ შესრულებული სრულიად ახალი და განსხვავებული ქალი-კატა ვიხილოთ.