სახალხო დამცველის 2015 წლის ანგარიშის მიხედვით, გალის ქართულ სკოლებში სწავლების პროცესი რუსულ ენაზე გადადის:

"დე-ფაქტო ადმინისტრაციის გადაწყვეტილებით, 2015-2016 სასწავლო წლიდან დარჩენილი ქართული სკოლების პირველიდან მეოთხე კლასებმა სწავლა რუსულ ენაზე დაიწყო, ხოლო დანარჩენ კლასებში შემცირდა ქართული ენისთვის დათმობილი საათები".

მშობლიური ენაზე განათლებისა და მისი ხელმისაწვდომობის პრობლემაზე უჩა ნანუაშვილმა დღეს, 6 მაისს, ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე ანგარიშის წარდგენისას ისაუბრა:

"პირველი კლასიდან დაიწყება რუსულ ენაზე სწავლება და მომავალ წლებში გალის სკოლებში ქართულ ენაზე სწავლა საერთოდ შეწყდება".

ომბუდსმენის თქმით, სწავლების რუსულ ენაზე გადასვლამ განათლების ხარისხი სერიოზულად გააუარესა.