სააპელაციო სასამართლოს უვადო მოსამართლე ვლადიმერ კაკაბაძემ ბიზნესმენ ფადი ასლი იმ სიტყვებისთვის უჩივლა, რომელიც ბიზნესმენს ნათქვამი არ ჰქონდა. ფადი ასლისთან სასამართლო დავაზე კაკაბაძემ 10 ოქტომბერს პარლამენტში ისაუბრა, სადაც მას, როგორც უზენაესის მოსამართლეობის კანდიდატს უსმენენ.

ევროპული საქართველოს დეპუტატმა, ოთო კახიძემ ჰკითხა მოსამართლეს, რატომ იჩივლა მან იმ სიტყვებისთვის, რომელიც ბიზნესმენს არ ეკუთვნოდა. დეპუტატმა რამდენიმე ფრაზაც წაიკითხა.

"მე როგორც აღვიქვი ეს ტელეინტერივიუები, მათ შორის პრესით გავრცელებული მასალა, ყოველ შემთხვევაში, ჩემს აღქმაში ეს გახლდათ მისი სიტყვები. თუმცა სააპელაციო სასამართლომ დაადგინა, რომ ეს იყო ჟურნალისტის გამონათქვამები", — განმარტა მოსამართლემ.

კაკაბაძის სიტყვებს, დეპუტატ ირაკლი აბესაძის რეპლიკა მოჰყვა:

"ასე ნაჩქარევად მოამზადეთ სარჩელი, რომ არ გადაამოწმეთ რას იცავდით?"

ამაზე მოსამართლემ კიდევ რთხელ უპასუხა, რომ მის აღქმაში ეს "მოპასუხის მიერ დასახელებული ფაქტები იყო".

2017 წელს მოსამართლემ სარჩელი აღძრა მორალური ზიანის ანაზღაურების მოთხოვნით მას შემდეგ, რაც ბიზნესმენმა მას კორუმპირებული უწოდა. თბილისის საქალაქო და სააპელაციო სასამართლოებში მოსამართლემ მოიგო დავა, თუმცა საქართველოს უზენაესმა სასამართლომ გააუქმა ქვედა ინსტანციის სასამართლოს გადაწყვეტილება და უარი უთხრა მოსამართლე ვლადიმერ კაკაბაძეს სარჩელის დაკმაყოფილებაზე.

ვლადიმერ კაკაბაძე სააპელაციო სასამართლოს სამოქალაქო საქმეთა პალატის უვადო მოსამართლეა. 2006-2016 წლებში იგი თბილისის საქალაქო სასამართლოს მოსამართლე იყო.

კანდიდატს განხილული აქვს ბოლო წლებში ერთ-ერთი ყველაზე გახმაურებული ფილიპ მორისის საქმე. მოსარჩელე "თბილისის თამბაქო" ითხოვდა კომპანია ფილიპ მორისის მიერ დემპინგით მიყენებული დიდი ოდენობით მატერიალური ზიანის ანაზღაურებას. მოსამართლე ვლადიმერ კაკაბაძემ სრულად გაიზიარა მოსარჩელის პოზიცია და, შესაბამისად, სრულად დააკმაყოფილა მისი მოთხოვნები. ვლადიმერ კაკაბაძემ მოპასუხეებს, საერთო ჯამში, დაახლოებით, 92 მილიონი ლარის გადახდა დააკისრა მოსარჩელის სასარგებლოდ.