შინაგან საქმეთა სამინისტროს ინფორმაციით, ბოლო პერიოდში ნარკოდანაშაულის ბრალდებით 8 პირი დააკვეს. მათ შორის 5-ს ნარკორეალიზატორობას ედავებიან.

უწყების განცხადებით, ერთ-ერთი დაკავებულის საცხოვრებელი ბინის ჩხრეკისას ნივთმტკიცებად ამოიღეს ბუპრენორფინის შემცველი ნარკოტიკული საშუალება სუბუტექსის 1 303 აბი და 16 ნატეხი, ასევე, 2 900 აშშ დოლარი და 100 ლარი. მათივე თქმით, ამოიღეს ბრალდებულის მიერ სხვადასხვა ლოკაციაზე განთავსებული, სარეალიზაციოდ გამზადებული ბუპრენორფინის შემცველი ნარკოტიკული საშუალება სუბოტექსის 40 აბი. საქმეზე გამოძიება საქართველოს სისხლის სამართლის კოდექსის 260-ე მუხლის მე-4 ნაწილით მიმდინარეობს.

მეორე დაკავებულის პირადი ჩხრეკისას, შსს-ს ინფორმაციით, 963 გრამი ნარკოტიკული საშუალება ჰეროინი ამოიღეს. ამ საქმეზე გამოძიება სსკ-ის 260-ე მუხლის მე-6 ნაწილის "ა" ქვეპუნქტით მიმდინარეობს.

უწყებაში ამბობენ, რომ დაკავებულთა შორის არიან ნარკორეალიზატორთა ორგანიზებული ჯგუფის წევრები, რომლებიც სარეალიზაციოდ გამზადებულ ნარკოტიკულ საშუალებებს თბილისის სხვადასხვა უბანში, სპეციალურ სამალავებში ათავსებდნენ და მათი შეძენის მსურველებს, საკომუნიკაციო პლატფორმების საშუალებით, აღნიშნული ლოკაციების ამსახველ ფოტოებს უგზავნიდნენ. მათ თქმით, ავტომანქანის, საცხოვრებელი სახლების და პირადი ჩხრეკისას, 170 აბი სუბუტექსი და სუბოქსინი, 19 შეკვრა სუბუტექსი, 7 შეკვრად დაფასოებული ფხვნილი, სავარაუდოდ, ე.წ. სირეცი, ახალი ფსიქოაქტიური ნივთიერება — ე.წ. ბიო, 6 შეკვრად დაფასოებული ნარკოტიკული საშუალება მეტადონის კრისტალები, ჰეროინი და მეტადონის ნატეხები — კრისტალებისა და ფხვნილის სახით, ნივთმტკიცებად ამოიღეს.

უწყების განცხადებით, ნარკორეალიზატორობაში ბრალდებული კიდევ ერთი პირის პირადი ჩხრეკისას ამოღებულია 1 შეკვრა ნარკოტიკული ნივთიერება ამფეტამინი, 8 შეკვრად დაფასოებული ახალი ფსიქოაქტიური ნივთიერება — ე.წ. ბიო და 2 შეკვრად დაფასოებული ნარკოტიკული ნივთიერება მარიხუანა.

გარდა ამისა, უწყებამ ერთი პირი თბილისის საერთაშორისო აეროპორტში, განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანის ბრალდებით დააკავა. მათი თქმით, დაკავებულის პირადი ჩხრეკისას, პოლიციამ მისი ფეხსაცმელების ძირებიდან 500 გრამამდე ჰეროინის შემცველი ნარკოტიკული საშუალება ამოიღო. გამოძიება საქართველოს სსკ-ის 260-ე მუხლის მე-6 ნაწილის "ა" ქვეპუნქტით
და 262-ე მუხლის მე-4 ნაწილის "ა" ქვეპუნქტით მიმდინარეობს.

თბილისის აეროპორტში დააკავეს კიდევ ერთ პირი, რომელსაც ჩანთაში 23 კილოგრამი მარიხუანა უპოვეს.