პრემიერ-მინისტრმა, გიორგი გახარიამ ჟურნალისტს უთხრა, რომ სისულელეებს ეკითხება და მოუწოდა ეს არ გააკეთოს. პრემიერის გაღიზიანება ნარკოდანაშაულში ბრალდებულ პოლიციელზე კითხვებმა გამოიწვია.

გახარიამ ამ კითხვის პასუხად გაიმეორა ის, რაც მთავრობის სხდომაზე თქვა, მკვლელობაში ბრალდებული პოლიციელის შესახებ. მისი თქმით, ასეთ შემთხვევებთან აბსოლუტურად დაუნდობელი და შეურიგებელი იქნებიან. მანვე აღნიშნა, რომ არავის მისცემს უფლებას ათასეულობით პოლიციელის რეპუტაცია შელახოს.

ამის შემდეგ გაისმა კითხვები, არიან თუ არა დაკავებულები ნარკორეალიზატორები და იცოდა თუ არა პრემიერმა ამის შესახებ, რაზეც გახარიამ აგრესიულად უპასუხა:

"შეგიძლიათ მილიონჯერ გაიმეოროთ და ათასობით კეთილსინდისიერი და ღირსეული პოლიციელის სახელით გეუბნებით, რომ ჩვენ დავაკავებთ პირველ რიგში იმას, ვინც შებღალავს პოლიციელის რეპუტაციას. გასაგებია? წერტილი. შეგიძლიათ კიდევ გაიმეოროთ ბევრჯერ ის, რაც გაიმეორეთ. სისულელეებს ნუ მეკითხებით".

შინაგან საქმეთა სამინისტროს ინფორმაციით, გენერალურმა ინსპექციამ ნარკოტიკული საშუალებების მოხმარების ბრალდებით თბილისის პოლიციის თანამშრომელი დააკავა. გარდა ამისა, რუსთავში 35 წლის კაცის განზრახ მკვლელობის საქმეზე 5 პირი, მათ შორის პოლიციის თანამშრომლები დააკავეს. უწყების ცნობით, დაკავებულებს შორის ორი შსს-ს რუსთავის საქალაქო სამმართველოს თანამშრომელი, ხოლო ერთი ყოფილი სამართალდამცველია.