სექსუალურ ძალადობაში ბრალდებული ილია ჯიშკარიანის ადვოკატი, მარიამ კუბლაშვილი ამ საქმეში სავარაუდო მსხვერპლს, თამთა თოდაძეს ადანაშაულებს. ამ საკითხზე მან On.ge-სთან ისაუბრა.

"მე მჯერა, რომ ეს კონკრეტული შემთხვევა არის ინსცენირება... ყოველგვარ ძალადობას ვგმობ, მაგრამ უდანაშაულო ადამიანი ციხეში არ უნდა წავიდეს", — ამბობს ჯიშკარიანი.

ის ფიქრობს, რომ სექსუალურ ძალადობაში ბრალდებული ჯიშკარიანი უდანაშაულოა და ამ საქმეში მონაწილეობით, როგორც ქალი, დისკომფორტს არ გრძნობს:

"დისკომფორტი არ მაქვს, როცა ქალი ადამიანს იმეტებს იმისთვის, რომ საკუთარი ნების განსახორციელებლად გაწიროს მამისხელა კაცი. დააბრალოს ის, რაც მას ნამდვილად არ ჩაუდენია, დაესხას თავს და შემდეგ თავი მსხვერპლად წარმოაჩინოს, მე არ მიმაჩნია, რომ ამ ქალის წინაშე რაიმე სახის უხერუხლობა უნდა მქონდეს".

კითხვაზე, მისი დაცვის ქვეშ მყოფისთვის მომგებიანი პოზიცია არის თუ არა, როცა ქალზე ძალადობის საქმეზე ქალი იცავს, პასუხის გაცემის დროს ქალების მხრიდან მის მიმართ ბულინგზე იწყებს საუბარს:

"როგორი ბულინგი და აგრესიაც მოდის უშუალოდ ქალი უფლებადამცველების მხრიდან... ქალი ადვოკატის უფლებებს ლახავენ, როცა მე ჩემს უფლებამოსილებას ვახორცილებ... მოწინააღმდეგე მხარე ხმარობს ყველაფერს".

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.