თბილისის საკრებულოში ქართული ოცნების დეპუტატის, ილია ჯიშკარიანის თანამშრომელი მას სექსუალურ და ფიზიკურ ძალადობაში ადანაშაულებს. ძალადობის სავარაუდო მსხვერპლი მთავარ არხთან ყვება, რომ ჯიშკარიანმა მასზე სექსუალური ძალადობა სცადა, როცა გაქცევა მოახერხა, შემდეგ ფიზიკურად იძალადა.

"ალკოჰოლური თრობის ქვეშ მყოფმა გადაწყვიტა, რომ შეეძლო ჩემთან დაემყარებინა აქტი და ჩამეხუტა, კისერში დამიწყო კოცნა, მოწი ტუჩებიო და ფეხებს შუა რომ გიცურებს ხელებს... უცებ დავინახე გვერდით ჩემი ტელეფონი, ვიღებ მეთქი ბატონო ილია... დამაგდო ძირს, ტელეფონი დამიფშვნა. როგორი გამოვიქეცი სახლში, არ მახსოვს, ისეთ ისტერიკაში ვიყავი, საკუთარი ხელით გამოვიძახე სასწრაფო, ფსიქოლოგიც კი დამინიშნეს. მე მე არ ვარ... არ ვიცი, რა კომენტარი გავაკეთო, ძალიან ცუდად ვარ", — ყვება ის.

დეპუტატის თანამშრომლის ინტერესებს არასამთავრობო ორგანიზაცია საფარი იცავს.

"ვფიქრობ, რომ ეს ადამიანი რომ არ იყოს პოლიტიკოსი და მაჟორიტარი, უკვე დაკავებული იქნებოდა, იმდენად მძიმე დანაშაულზეა საუბარი", — ამბობს საფარის ხელმძღვანელი, ბაია პატარაია.

მთავარი არხის ინფორმაციით, დეპუტატმა სატელეფონო ზარს არ უპასუხა, მხოლოდ ის მისწერა, რომ სიბინძურეზე პასუხის გაცემა არ სურს და საქმეს სამართლებრივი გზით გაარკვევს. შინაგან საქმეთა სამინისტროში On.ge-ს უთხრეს, რომ საქმეზე გამოძიება სამი მუხლით დაიწყო.