ინდოეთში მემორიალიდან მაჰათმა განდის ფერფლი მოიპარეს. პოლიციის ინფორმაციით, ქურდობა 2 ოქტომბერს, განდის დაბადების 150 წლისთავზე მოხდა. გარდა ამისა, დამოუკიდებლობისთვის მებრძოლის ფოტოზე მწვანე საღებავით "მოღალატე" დააწერეს.

ფოტო: BBC

მაჰათმა განდის ფერფლი მემორიალში 1948 წლიდან ინახება, მას შემდეგ რაც ის ექსტრემისტმა მოკლა. მისი ფერფლი, ინდუიზმის ტრადიციების საწინააღმდეგოდ, რამდენიმე ნაწილად დაანაწილეს. ერთ-ერთი ნაწილი კი მადჰია-პრადეშის შტატის მემორიალში ინახებოდა.

მაჰათმა განდი, რომელიც ცნობილია, როგორც ინდოეთის "ერის მამა" 1868 წლის 2 ოქტომბერს დაიბადა. ეს თარიღი ინდოეთში სამ ყველაზე მნიშვნელოვან სახელმწიფო დღესასწაულს შორის ერთ-ერთია, რომლის დროსაც მთელი ქვეყნის მასშტაბით მასობრივი ღონისძიებები იმართება. 2007 წლიდან გაერთიანებული ერების ორგანიზაციამ კი სწორედ ამ დღეს განდის საპატივცემულოდ ძალადობის საწინააღმდეგო საერთაშორისო დღის აღნიშვნა დაიწყო.

მისი ნამდვილი სახელი და გვარი მოჰანდას კარამჩანდ განდია, რომელსაც მაჰათმა 1914 წელს შეარქვეს დიდი პატივისცემის ნიშნად — მაჰათმა ითარგმნება, როგორც დიადი სული.

ის იყო მწერალი, საზოგადოებრივი აქტივისტი და პოლიტიკოსი, რომელმაც არაძალადობრივი მეთოდებით გაილაშქრა ინდოეთში დიდი ბრიტანეთის კოლონიალისტური პოლიტიკის წინააღმდეგ. მან უზარმაზარი როლი შეასრულა იმაში, რომ ინდოეთი გათავისუფლებულიყო ძალადობრივი მმართველობისგან და დამოუკიდებლობა მოეპოვებინა. სწორედ ამ ფაქტიდან მალევე, 1948 წლის 30 იანვარს განდი მოკლეს.

განდის შეხედულებებმა პოლიტიკაზე და ზოგადად კაცობრიობის შესახებ მისმა კეთილშობილურმა მსოფლმხედველობამ შემდეგში გავლენა მოახდინა ისეთ ცნობილ ადამიანებზე, როგორებიც არიან მარტინ ლუთერ კინგი, ნელსონ მანდელა და სხვა.