ბორჯღალოსნები ფიჯის ეროვნულ ნაკრებთან დამარცხების შემდეგ ქართველ გულშემატკივარს ბოდიშს უხდიან. ოსაკაში გამართულ მატჩზე ქართველმა მორაგბეებმა ფიჯისთან 45-10 დათმეს.

"არ ვიცი რა მოხდა. ფიჯელებმა საუცხოოდ ითამაშეს, ჩვენ კი ვერ შევძელით ისე თამაში, რომ შესაძლებლობები ქულებად გვექცია და რა თქმა უნდა, შედეგი ძალიან გულდასაწყვეტია. შედეგებით ძალიან იმედგაცრუებული ვართ. ჩვენ სულ გვაქვს თავდადება და ვალდებულების გრძნობა, თუმცა ეს ყოველთვის საკმარისი არ არის, როცა ქულები და გამარჯვება გჭირდება. ქულის მოპოვების გარეშე თავდადებას აზრი არ აქვს.

ბოდიში მინდა მოვუხადო ჩვენს გულშემატკივარს. ვიცით რამდენს ნიშნავდა მათთვის ეს მატჩი. ჩვენ ძალიან ვწუხვართ, რომ მათი გახარება ვერ შევძელით", — განაცხადა მერაბ შარიქაძემ.

"ძალიან რთულია მატჩის შესახებ ლაპარაკი. ფიჯიმ ითამაშა, ალბათ, საუკეთესო თამაში, რაც აქამდე უთამაშია. გვქონდა ძალიან ბევრი შეცდომები, რაც ფიჯისთვის ხელსაყრელი აღმოჩნდა, გამოიყენეს თვისი შესაძლებლობები და მოგვახვიეს თავს. მინდა ბოდიში მოვუხადო ქართველ გულშემატკივარს. მაინც ბოლომდე გვერდში დგომისთვის მადლობა", — გიორგი კვესელაძე.

ბორჯღალოსნებს წინ ჯგუფური ეტაპის კიდევ ერთი მატჩი აქვთ. თუმცა როგორც რაგბის ფედერაცია აცხადებს დასახული მიზნის მიღწევა, ჯგუფში მესამე ადგილის დაკავება წარმოუდგენლად რთული გახდა.