მამუკა ხაზარაძის საზოგადოებრივი მოძრაობა ლელოს წევრებმა გუგუტიანთკარში მცხოვრები რაზმაძეების ოჯახისთვის საჩუქრად გადასაცემი სახლი გორის გამგეობასთან მიიტანეს.

მათი თქმით, გამგეობას აცნობეს, რომ სახლი მზად არის და ახლა გამგეობისგან ელოდებიან, რომ მიწის ნაკვეთი გამოყოს, სადაც სახლს დადგამენ. მათივე თქმით, მნიშვნელოვანია, რომ ეს სახლი ე.წ. საზღვართან დაიდგას, რათა საქართველოს მოქალაქემ იქ იცხოვროს.

ამასთან დაკავშირებით გორის მერიაში ამბობენ, რომ რაზმაძეების ოჯახს დაუკავშირდნენ.

"მათ განაცხადეს, რომ მზად არიან მიიღონ ხის კოტეჯი, რომელსაც შემდეგ, საკუთარი შეხედულებისამებრ გამოიყენებენ და უარს ამბობენ ყოველგვარ პოლიტიკურ სპეკულაციებში ჩაბმაზე", — აღნიშნავენ მერიაში.

მამუკა ხაზარაძემ 16 აგვისტოს თქვა, რომ რაზმაძეების ოჯახს უახლოეს ერთ თვეში ახალი სახლი ექნებოდა. 15 აგვისტოს გორის მუნიციპალიტეტის სოფელ გუგუტიანთკარში საოკუპაციო რეჟიმმა ე.წ. საზღვრის გავლების უკანონო პროცესი განაახლა. საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ეს ოჯახები სწორედ ამ მიწის ნაკვეთებს ამუშავებდნენ და მოსავალი მოჰყავდათ.