ტექნიკის მაღაზია iPlus მოქალაქეთა ფარული აუდიო-ვიდეო ჩაწერისთვის სახელმწიფო ინსპექტორის სამსახურმა დაასანქცირა. აპარატმა მიიჩნია, რომ კომპანია მაღაზია გარე პერიმეტრზე კანონდარღვევით იღებდა ვიდეოს და იწერდა ხმას. კომპანიამ ამ მიზეზით გაფრთხილება მიიღო.

უწყებაში აღნიშნავენ, რომ კომპანიამ ვერ დაასაბუთა მათ მიერ გადაღებული აუდიო-ვიდეო მასალის ინტერნეტით გასაჯაროების სამართლებრივი საფუძვლები და მიზნები.

სახელმწიფო ინსპექტორის სამსახურმა შპს აიპლუსის მიერ მოქალაქეთა აუდიო-ვიდეო ჩაწერის კანონიერების შესწავლა მას შემდეგ დაიწყო, რაც კომპანიამ 28 აგვისტოს ქალის მიერ ბავშვის დაჭრის ამსახველი მასალა გაასაჯაროა.

გავრცელებულ ვიდეოში შესაძლებელი იყო ქუჩაში გამვლელების საუბრის მოსმენა და მათი იდენტიფიცირება. როგორც სახელმწიფო ინსპექტორი განმარტავდა, ვიდეოჩანაწერი პერსონალურ მონაცემს შეიცავდა.