ბოლო მონაცემებით, ცესკოს 3 702 უბნიდან 3 667-ის მონაცემები დათვლილი აქვს, რომლის მიხედვითაც საარჩევნო ბარიერი მხოლოდ 2-მა პარტიამ გადალახა.

ამ მომენტისთვის არსებული წინასწარი მონაცემებით, 72 ოლქიდან, სადაც ოცნებას წარდგენილი ჰყავდა მაჟორიტარობის კანდიდატები, პარტიის სახელით გასული კანდიდატი არ ლიდერობს მხოლოდ ხაშურში, #43-ე ოლქში და ახალციხეში, ადიგენში, #44-ე ოლქში.

ხაშურში ლიდერობს პარტია თოფაძე-მრეწველები - ჩვენი საქართველოს კანდიდატი სიმონ ნოზაძე, რომელსაც ხმების 31,95% აქვს, ხოლო ქართული ოცნების კანდიდატ ვალერი გელაშვილს 20,04% აქვს.

ადიგენში ლიდერობს პარტია ნაციონალური მოძრაობის კანდიდატი ვაჟა ჩიტაშვილი, რომელსაც ხმების 44,6% აქვს, ხოლო ქართული ოცნების კანდიდატ გიორგი კოპაძეს - 38,8%.

აღსანიშნავია, რომ ორივე ოლქში არჩევნების მეორე ტური დაინიშნება, რადგან კანდიდატებიდან არცერთს აქვს 50%-ზე მაღალი მაჩვენებელი.

ამ მომენტისთვის არსებული წინასწარი მონაცემებით, გამარჯვებული მაჟორიტარი კანდიდატების გამოსავლენად მეორე ტური დაინიშნება 51 ოლქში. მეორე ტურში მონაწილეობას იღებს ის ორი კანდიდატი, რომლებმაც პირველ ტურში ყველაზე მეტი ხმა მიიღეს.

შეგახსენებთ, რომ ქართულ ოცნებას საკუთარი მაჟორიტარობის კანდიდატი არ ჰყავდა დასახელებული მთაწმინდის ოლქში, სადაც პარტია დამოუკიდებელ კანდიდატ სალომე ზურაბიშვილს უჭერდა მხარს.