"აი, იცით რა?.. კონცენტრირება მიჭირს" — ასე უპასუხა უზენაესი მოსამართლეობის კანდიდატმა, მამუკა ვასაძემ კითხვაზე, რომელიც პატივისა და ღირსების განსხვავებას ეხებოდა. მოსამართლეობის კანდიდატს, რომელიც ამავე დროს პროკურორის პირველი მოადგილეა, კითხვა კოალიცია დამოუკიდებელი მართლმსაჯულებისთვის წარმომადგენელმა, გიორგი მშვენიერაძემ დაუსვა.

მშვენიერაძე: რითი განსხვავდება ერთმანეთისგან პატივი და ღირსება? აქვე გეტყვით, რომ საკონსტიტუციო სასამართლოს აქვს ეს განმარტებული, აქვს საერთო სასამართლოებსაც განმარტებული, სადაც შემობიჯებას ახლა აპირებთ. მინდა გაიხსენოთ, რა განსხვავებაა კონსტიტუციურსამართლებრივ განზომილებას ღირსებას და სამოქალაქოსამართლებრივ განზომილებას შორის. ჯერ გავმიჯნოთ პატივი და ღირსება და შემდეგ ეს...

ვასაძე: სამოქალაქო სამართალს ნაკლებად ვიცნობ. ღირსება კონსტიტუციურ სამართალში ნიშნავს ადამიანის უფლებას, რომელიც ხელშეუხებელია, შეუვალია ღირსება. ადამიანის ღირსება შეუვალია ნიშნავს, ყოველი ადამიანი იმსახურებს ადამიანურ პირობებში და მისი ღირსების შესაბამის პირობებს, პირობების უზრუნველყოფას და დაუშვებელია მისი ღირსებისა და პატივის შელახვა, რაც ნიშნავს...

მშვენიერაძე: იგივეობრივი ცნებებია, რომ დავაზუსტოთ, პატივი და ღირსება?

ვასაძე: აი, იცით რა?.. კონცენტრირება მიჭირს, პირდაპირ, გულღიად რომ გითხრათ, ამ საკითხთან დაკავშირებით...

დღეს, 27 სექტემბერს იურიდიულ საკითხთა კომიტეტში მამუკა ვასაძეს უსმენენ. მამუკა ვასაძე გენერალური პროკურორის პირველი მოადგილეა. 2014-2015 წლებში იგი ამავე უწყებაში საგამოძიებო ნაწილის უფროსი იყო, ხოლო წინა ხელისუფლების დროს, 2005-2014 წლებში ფინანსურ პოლიციაში მუშაობდა.

2018 წლის ივნის-ივლისში, ირაკლი შოთაძის გადადგომის შემდეგ, მამუკა ვასაძე გენერალური პროკურორის მოვალეობას ასრულებდა. პროკურატურის საქმიანობას უკავშირდება ბევრი გაჭიანურებული გამოძიება, მათ შორის, ხორავას ქუჩის საქმე, მაჩალიკაშვილის საქმე, პირადი ცხოვრების ამსახველი ვიდეო და აუდიომასალების ინტერნეტში გავრცელება, ბირჟა-მაფიას საქმე, კლუბ ბასიანსა და გალერიში ჩატარებული სპეცოპერაციისას უფლებამოსილების გადამეტების სავარაუდო ფაქტები, ზვიად რატიანის საქმე, წინასაარჩევნოდ მომხდარი ინციდენტები. კორცხელის ინციდენტი და სხვა.

ამავე თემაზე: