პარლამენტის დამოუკიდებელმა დეპუტატმა, ეკა ბესელიამ გადაცემა რეაქციაში ისაუბრა ყოფილ თანაპარტიელ ვანო ზარდიაშვილთან ურთიერთობაზე, რომელსაც სახეში ხელი გაარტყა. ბესელიამ აღნიშნა, რომ ზარდიაშვილთან არასდროს ჰქონია კარგი ურთიერთობა, რადგან გაცნობის პირველივე დღეს ის სასამართლოს კონტროლზე ესაუბრა.

"მე მის შესახებ გავიგე, რომ მოიყვანეს კომიტეტში. ვიცი, რომ ჩინჩალაძემ ჩასვა საპარლამენტო სიაში, მოგვიანებით ეს დადასტურდა და ივანიშვილმა ეს იცოდა ძალიან კარგად. შეიძლება ახლა თქვას, რომ არ იცოდა, თუმცა მის მიმართ ჰქონდა ნეგატიური რეაქცია, რასაც ჩემთან ამჟღავნებდა.

ახალდაწყებულია, ახალი მოწვევის პარლამენტია და ზარდიაშვილი შემოდის ჩემს ოთახში. აი, ასე, შეშინებული, მორიდებული, საცოდავად და მეუბნება, რომ ჩვენ სასამართლოსო... სასამართლოს სახელით მელაპარაკებოდა და უცებ ვერ მივხვდი, შემძრა ამან. გამიკვირდა, რა ჩვენ სასამართლო, შენ სასამართლო რატომ ხარ?!. მითხრა, ჩვენ სასამართლოსო ორი უფროსი, ორი ბატონი გვეყოლებაო, რომლის ყველა სიტყვას შევასრულებთო. ერთი ივანიშვილი და მეორე შენო, ოღონდ ჩვენთან უნდა იმეგობროო...

აი, მაშინ პირველად გამიცნობიერდა, რა როლით იყო ეს ადამიანი შემოსული პარლამენტში. მივუთითე კარებისკენ და ვუთხარი, ახლავე დატოვე ჩემი ოთახი-მეთქი", — განაცხადა ბესელიამ.

გარდა ამისა, ბესელიას თქმით, ზარდიაშვილმა მალევე განაცხადა, რომ იურიდიული კომიტეტში ის "ბევრს შრომობდა" და "ტენდერებში რაღაც ეკუთვნოდა". მისი განმარტებით, საუბარია ინფრასტრუქტურის სამინისტროს ან მერიის ტენდერებზე.

"წამოცდა იმიტომ, რომ უტვინოა ყველაფერთან ერთად და ბრიყვი", — განაცხადა ბესელიამ.

გადაცემის წამყვანმა, ეკა ბესელიამ განაცხადა, რომ ვანო ზარდიაშვილს პირდაპირ ეთერში ჩართვა და პასუხის გაცემა სურდა. წამყვანის განმარტებით, მის შეფასებას მოგვიანებით მოვისმენთ, რადგან ბესელიას პირობა მისცა, რომ ეთერში მარტო მიიღებდა.

On.ge-მ სცადა ზარდიაშვილთან დაკავშირება, თუმცა კომუნიკაცია ვერ შედგა.

დღეს, 26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ეკა ბესელიასა და ვანო ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია ყოფილ თანაგუნდელს ხელით შეეხო.

ბესელია ამბობს, რომ საბოდიშო არაფერი აქვს. ის აფრთხილებს ყველას, რომ მსგავსი ქცევის შემთხვევაში, იგივე პასუხს მიიღებენ.

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.

ამავე თემაზე: