გაეროში გასამგზავრებლად რუსეთის დელეგაციის ათმა წევრმა აშშ-ს ვიზა ვერ მიიღო. მათ შორის არის საგარეო საქმეთა საკითხებში ფედერაციის საბჭოს თავმჯდომარე, კონსტანტინ კოსაჩევი, რომელსაც გენერალური ასამბლეის მუშაობაში მონაწილეობა უნდა მიეღო

რუსეთის საგარეო საქმეთა სამინისტროს წარმომადგენელი, მარია ზახაროვა ამბობს, რომ ამერიკული მხარე ტექნიკურ პრობლემასა და დოკუმენტების მიწოდების ვადებზე აპელირებს. ზახაროვა ამტკიცებს, რომ რუსულმა დელეგაციამ საელჩოს დოკუმენტები ვადებში მიაწოდა.

"ეს არის ამერიკის შეერთებული შტატების მხრიდან გაეროს წევრების უპატივცემულობის აღმაშფოთებელი მაგალითი, აგრეთვე, საერთაშორისო ორგანიზაციის მასპინძელი ქვეყნის მიერ ნაკისრი ვალდებულებების შეუსრულებლობა", — წერს ზახაროვა ფეისბუქზე.

რადიო თავისუფლების რუსული ბიუროს ინფორმაციით, დელეგაციის წევრები ნიუ-იორკში გამგზავრებას 24 სექტემბერს გეგმავდნენ. გენერალური ასამბლეის სესია 23 სექტემბერს დაიწყო. ზახაროვას თქმით, აღნიშნული ინციდენტი საგარეო საქმეთა მინისტრის, სერგეი ლავროვისა და აშშ-ს სახელმწიფო მდივნის, მაიკ პომპეოს შეხვედრის ცენტრალური საკითხი იქნება.