თბილისში პიანისტ ხატია ბუნიათიშვილისა და თბილისის სიმფონიური ორკესტრის კონცერტის ყველა ბილეთი 23 წუთში გაიყიდა. კონცერტის ბილეთების გაყიდვა 11:00 საათზე დაიწყო და 11:23 საათზე ბოლო ბილეთი გაიყიდა. ინფორმაცია On.ge-ს biletebi.ge-ში დაუდასტურეს, სადაც ღონისძიების ბილეთები იყიდებოდა.

კონცერტი 28 სექტემბერს ჯანსუღ კახიძის სახელობის თბილისის მუსიკალურ-კულტურულ ცენტრში გაიმართება.

"27-ე საერთაშორისო მუსიკალური ფესტივალის "შემოდგომის თბილისი" ფარგლებში წარმოგიდგენთ მსოფლიო მასშტაბის ვარსკვლავს, პიანისტს ხატია ბუნიათიშვილს, რომელიც გამართავს კონცერტს თბილისის სიმფონიურ ორკესტრთან ერთად მაესტრო ვახტანგ კახიძის ხელმძღვანელობით. კონცერტის პროგრამა აგებულია პეტრე ჩაიკოვსკისა და იგორ სტრავინსკის ნაწარმოებებზე", — წერია კონცერტის აღწერაში.