იუსტიციის მინისტრი, თეა წულუკიანი ამბობს, რომ მარიამობის შეწყალებისას მოლოდინი ჰქონდა, რომ პრეზიდენტი ან ადმინისტრაცია დაეკონტაქტებოდა და სამინისტროს აზრს ჰკითხავდა. როგორც მან გადაცემა თავისუფალ ხედვაში თქვა, ამგვარი კონტაქტი ახალი წლისა და აღდგომის შეწყალების დროს ჰქონდათ:

"ესა და ეს პატიმარი ჩვენგან შეწყალებას ითხოვს და ნამდვილად შვილები ჰყავს სახლში? ნამდვილად ავად არის? ნამდვილად სიმსივნე აქვს? ეს ჩვენ წინა ორი შეწყალებისას შეგვიმოწმებია და გვითქვამს, რომ არ იტყუება, ნამდვილად მცირეწლოვანი ბავშვები ელოდებიან".

როგორც ის ამბობს, მარიამობისას მათ პირდაპირ მიიღეს პრეზიდენტის ხელმოწერილი აქტი, რომლის მიხედვითაც 24 პირიდან 23-მა პირდაპირ დატოვა საპატიმრო, ერთი კი ამ დრომდე ძებნილია.

გარდა ამისა, მინისტრმა შეწყალების სისტემის რეფორმაზე ისაუბრა. მისი თქმით, პრეზიდენტის ინიციატივით ამაზე არაერთი საუბარი შედგა. წულუკიანის შეფასებით, სისტემის ხარვეზი გაუმჭვირვალობა და კომისიის შემადგენლობაა:

"მარგველაშვილის დროინდელი კომისია სალომე ზურაბიშვილმა იანვარში გააუქმა და მას შემდეგ აღარ არსებობს. ქაღალდზე არსებობს პრეზიდენტთან არსებული შეწყალების კომისია, მაგრამ სხვაგან არსად და რეალური ადამიანები, რამდენადაც ჩემთვის არის ცნობილი, არ არსებობენ. კომისია რაკი არ არსებობს, შესაბამისად, ვერც იმას ვამბობ რომ ცუდია, რადგან კომისია არ არსებობს და შესაბამისად ხარვეზი ისაა, რომ კომისია მხოლოდ ქაღალდზე არსებობს".

მინისტრის განმარტებით, კანონით პრეზიდენტი არ არის ვალდებული კომისია ჰყავდეს, თუმცა ასეთ დროს უნდა გაიწეროს მკაცრი კრიტერიუმები, თუ რის მიხედვით უნდა შეიწყალონ ადამიანი:

"შეწყალების უფლება ვერ იქნება ულიმიტო. წინააღმდეგ შემთხვევაში მივალთ ისეთ სამწუხარო შედეგამდე, როგორც მივედით მარიამობის შეწყალებამდე, როცა მკვლელობის მუხლით [მსჯავრდებული] სამი ადამიანი იქნა შეწყალებული".

მისივე თქმით, თუ პრეზიდენტი გადაწყვეტს, რომ კომისია იყოლიოს, მაშინ ის ისეთი ადამიანებით უნდა დაკომპლექტდეს, რომელთაც იციან თუ რა არის რესოციალიზაცია-რეაბილიტაცია.

პრეზიდენტის მიერ შეწყალების სისტემის გამჭვირვალობასთან დაკავშირებით ბოლო რამდენიმე კვირაში არაერთი კითხვა დაისვა. 17 სექტემბერს ცნობილი გახდა, რომ სალომე ზურაბიშვილმა მარიამობისას მკვლელობაში მსჯავრდებული კიდევ ერთი პირი, ზურაბ ნადირაძე შეიწყალა. მის ექსტრადიციას საქართველოს მთავრობა 23 წლის განმავლობაში ითხოვდა.

16 სექტემბერს ცნობილი გახდა, რომ პრეზიდენტმა, სალომე ზურაბიშვილმა 18 წლის დათო ოთხმეზურის მკვლელობისთვის გასამართლებული ასლან ბეჟანიძე შეიწყალა. ბეჟანიძე 2016 წლის მარტში დააკავეს და 11 წელი ჰქონდა მისჯილი.

გარდა ამისა, პრეზიდენტმა შეიწყალა პირი, რომელიც ბათუმში პოლიციელის, თარაშ მუკბანიანის მკვლელობისთვის იყო მსჯავრდებული. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

თვითონ სალომე ზურაბიშვილმა მაშინ გადაწყვეტილების განმარტებაზე უარი განაცხადა. მისი თქმი, შეწყალება პრეზიდენტის დისკრეციული უფლებაა.

"ეს უცებ გახდა რაღაც სალაპარაკო პრობლემა იმ დროს, როცა აქ ამდენი არის პოზიტივზე სალაპარაკო. ესეც დიდად არ მიკვირს. თუ რამე განცხადება არის უფრო დეტალური გასაკეთებელი, ეს უნდა გაკეთდეს თბილისში", — თქვა ზურაბიშვილმა.

პრეზიდენტის გადაწყვეტილებას კრიტიკით შეხვდნენ როგორც ხელისუფლების, ისე ოპოზიციის წარმომადგენლები. ამასთანავე, რამაზ დევაძის შეწყალება მიუღებელი აღმოჩნდა მმართველი პარტიის დეპუტატებისთვის. რამდენიმედღიანი კრიტიკის შემდეგ პრეზიდენტი გამოვიდა ინიციატივით, რომ შეწყალების უფლება დაიხვეწოს.