ნაციონალური მოძრაობის დეპუტატის, ნიკა მელიას თქმით, ის არ აპირებს სასამართლოს აკრძალვას დაემორჩილოს და მაინც გავა იქ "სადაც ჩათვლის საჭიროდ". ნიკა მელია ამ თემაზე დღეს, 13 სექტემბერს პროკურატურაში იყო. მას გაფრთხილება მისცეს, თუკი ისევ გავიდოდა სახლიდან უნებართვოდ, აღკვეთის ღონისძიება უფრო მკაცრი სასჯელით შეიცვლებოდა.

"მე ვუთხარი, რომ აუცილებლად, სადაც ჩავთვლი საჭიროდ, რომელ ტელე-რადიო კომპანიაშიც ჩავთვლი საჭიროდ, იქ მივალ. მიუხედავად იმისა, პროკურატურა ამაზე თანხმობას განაცხადებს, თუ არა. თუ პროკურატურა უარს განაცხადებს, მაინც მივალ. მორჩა და გათავდა", — თქვა მელიამ პროკურატურის დატოვების შემდეგ.

დღეს, 13 სექტემბერს პროკურატურამ განცხადება გაავრცელა, რომ ნიკა მელიამ აკრძალვა "დემონსტრაციულად დაარღვია" და ტელეკომპანია კავკასიაში დავით აქუბარდიას გადაცემაში მიიღო მონაწილეობა.

ნიკა მელია მისთვის 20 ივნისის ღამეს, ჯგუფური ძალადობის საქმეზე ბრალის წაყენებისა და აღკვეთის ღონისძიების შეფარდების შემდეგ პირველად მივიდა პარლამენტში.

ნიკა მელიას 20 ივნისის საქმეზე აღკვეთის ღონისძიებად გირაო შეეფარდა და სახლიდან გასვლისთვის პროკურატურის ნებართვა სჭირდება. მას ბრალი აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის სისხლის სამართლის კოდექსის 225-ე მუხლის პირველი და მეორე ნაწილებით წაუყენეს.