პატრიოტთა ალიანსის დეპუტატი, ირმა ინაშვილი დიპლომატ მეთიუ ბრაიზას ცილისწამებაში ადანაშაულებს და ახლა პროკურატურისგან გამოძიების დაწყებას ითხოვს. ინაშვილის თქმით, ბრაიზამ მოიტყუა, როდესაც დეპუტატი კონფერენციის ორგანიზატორის მიმართ ფიზიკურ ძალადობაში დაადანაშაულა.

"მეთიუ ბრაიზა, აი, ამ სამარცხვინო ტყუილის და ჩემთან დაკავშირებული ცილისწამების გამო პასუხს აუცილებლად აგებს. მე მივმართავ მთავარ პროკურატურას, დაიწყოს გამოძიება ამ ფაქტთან დაკავშირებით. დაიკითხოს ყველა დამსწრე, ვინც იმ დროს დარბაზში იყო. დაიკითხოს [დევიდ] კრამერიც, ქალბატონი [ნინო] ევგენიძეც", — აღნიშნა ირმა ინაშვილმა.

10 სექტემბერს თბილისში, სასტუმრო რუმსში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ კონფერენციაზე ირმა ინაშვილის დაუპატიჟებლად მისვლას ხმაური და დაპირისპირება მოჰყვა. კონფერენციის ორგანიზატორებმა ინაშვილს განუმარტეს, რომ ის არ იყო სიაში, შესაბამისად, კონფერენცია უნდა დაეტოვებინა. კონფერენციის დატოვებისკენ მოუწოდა აშშ-ის სახელმწიფო მდივნის ყოფილმა თანაშემწემ, დევიდ კრამერმაც. ინაშვილმა თქვა, რომ წინა დღეს ამავე კონფერენციაზე დეპუტატმა გიგა ბოკერიამ მისი მისამართით ცილისმწამებლური განცხადება გააკეთა და ის პასუხის გასაცემად მივიდა. სტუმრების ნაწილმა აღნიშნა, რომ ირმა ინაშვილის ქმედება მიუღებელი იყო.

დაპირისპირების შემდეგ ირმა ინაშვილი სიტყვით მაინც გამოვიდა. როგორც მან განაცხადა, მისი პარტია პროდასავლური აზროვნებისაა. სიტყვით გამოსვლისას მან დევიდ კრამერისგან ბოდიშის მოხდაც მოითხოვა.

ბოდიშის მოხდის გარდა ინაშვილი ე.წ. კრამერის სიას მოამზადებს, რომელსაც პარლამენტს წარუდგენს. მისივე თქმით, ამავე სიაში შევა მეთიუ ბრაიზა, რომელიც ამერიკელი დიპლომატი და სახელმწიფო დეპარტამენტის ყოფილი მაღალჩინოსანია.

ამერიკელმა დიპლომატმა და სახელმწიფო დეპარტამენტის ყოფილმა მაღალჩინოსანმა, მეთიუ ბრაიზამ განაცხადა, რომ პატრიოტთა ალიანსის დეპუტატმა ირმა ინაშვილმა ბოდიში თავად უნდა მოიხადოს:

"ამ ქალმა ფიზიკური შეურაცხყოფა მიაყენა ნინო ევგენიძეს. ჩემს ქვეყანაში ამის გამო ის ციხეში მოხვდებოდა. ის მას აჯანჯღარებდა და ფხაჭნიდა", — ამბობს მეთიუ ბრაიზა ტელეკომპანია მთავარი არხის თარგმანის მიხედვით.