ნაციონალურმა მოძრაობამ გადაწყვეტილება შეცვალა და ბოიკოტის მიუხედავად, პრემიერობის კანდიდატის, გიორგი გახარიას მთავრობას ფრაქციის ფორმატში მოუსმენს. ინფორმაცია On.ge-ს პარტიის პრესსამსახურში დაუდასტურეს.

ფრაქციის ფორმატში მინისტრობის კანდიდატების მოსმენა 12:00 საათზეა ჩანიშნული. ბოიკოტის მიუხედავად, გახარიას მთავრობას ფრაქციის ფორმატში ევროპული საქართველოც მოუსმენს.

საქართველოს პარლამენტში მთავრობის დამტკიცების პროცედურა 4 სექტემბერს დაიწყო. მინისტრთა კაბინეტის საკომიტეტო მოსმენას ბოიკოტი გამოუცხადეს ევროპული საქართველოსა და ნაციონალური მოძრაობის დეპუტატებმა.

ოპოზიციონერი დეპუტატები გიორგი გახარიას პრემიერ-მინისტრად წარდგენას აპროტესტებდნენ. ამ პოსტზე გახარიას წარდგენის შემდეგ პარლამენტთან და ქართული ოცნების ოფისთან რამდენიმე აქცია გაიმართა. აქციებს ერთ-ერთი ორგანიზატორი მოძრაობა #სირცხვილიაა, რომელიც 70 დღეზე მეტია შინაგან საქმეთა მინისტრის პოსტიდან გიორგი გახარიას გადადგომას ითხოვდა. 2 სექტემბერს მამუკა ბახტაძემ პრემიერ-მინისტრის პოსტი დატოვა. ქართულმა ოცნებამ ამ თანამდებობაზე გიორგი გახარია წარადგინა.