"რატომ არ მეკითხებით, ჩატაევის მოკვლაზე რატომ არ ვგრძნობ პასუხისმგებლობას?" — ამის შესახებ სახელმწიფო უსაფრთხოების სამსახურის ხელმძღვანელმა და შინაგან საქმეთა მინისტრობის კანდიდატმა ვახტანგ გომელაურმა თემირლან მაჩალიკაშვილზე საუბრისას განაცხადა.

"მისი [ჩატაევის] ოჯახის წევრებიც საუბრობდნენ, ზოგი ჩეჩნეთში, ზოგი რუსეთში და ზოგი გერმანიაში. გავაიგივებ რადგან მათი გუნდის წევრი იყო [თემირლანი], მაგრამ ეს ბავშვი იყო ჩათრეული..." — აღნიშნა გომელაურმა.

მისივე თქმით, თუ გამოვლინდა, რომ თემირლან მაჩალიკაშვილის დაღუპვაში სპეცრაზმელია დამნაშავე, ის ციხეში ჩაჯდება.

"მე როცა ვარ პატრულის თანამშრომელი ან სპეცრაზმელი, იქ არ ვეკითხები არც მინისტრს და არც ხელმძღვანელს, რომ შევდივარ მე ოთახში ტერორისტი იქნება თუ კრიმინალი, როგორ უნდა გამოვიყენო იარაღი. მე მაქვს ჩემი კანონი, ვესროლო თუ არა. მე რომ გავისვრი მე უნდა ვაგო პასუხი და არა ჩემმა მინისტრმა. სახელმწიფო აძლევს მას იარაღს და გამოყენების უფლებას", — უთხრა გომელაურმა ჟურნალისტებს.

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა. რამდენიმე კვირის შემდეგ, 26 დეკემბერს, პანკისში ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო.