საქართველოს პრემიერობის კანდიდატმა, გიორგი გახარიამ თქვა, რომ მას შინაგან საქმეთა სამინისტროში სახელმწიფო უსაფრთხოების სამსახურის ხელმძღვანელი, ვახტანგ გომელაური შეცვლის, ხოლო თავდაცვის სამინისტროს ირაკლი ღარიბაშვილი უხელმძღვანელებს. ამის შესახებ გახარიამ მისი კანდიდატად წარდგენის შემდეგ განაცხადა.

ვახტანგ გომელაური ერთხელ უკვე იყო შინაგან საქმეთა მინისტრი, მას შემდეგ კი სახელმწიფო უსაფრთხოების სამსახურს ხელმძღვანელობს. მისი სუს-ში მუშაობის დროს ჩატარდა სპეცოპერაცია ორთაჭალასა და პანკისში. პანკისში ამ სპეცოპერაციის შედეგად მოკლული თემირლან მაჩალიკაშვილის მამა ამ დრომდე მტკიცებულებების წარდგენას ითხოვს.

გომელაურის სამუშაო გამოცდილება:

  • 1994 წლიდან — სამთავრობო დაცვის სპეციალური სამსახური, სპეციალური ქვედანაყოფის საბრძოლო განყოფილების უფროსი;
  • 2002 წლიდან — შსს დაცვის პოლიცია;
  • 2013 წლამდე – პრემიერ-მინისტრ — ბიძინა ივანიშვილის დაცვის უფროსი;
  • 2013-2014წწ. — შინაგან საქმეთა მინისტრის მოადგილე;
  • 2015 წელს — შინაგან საქმეთა მინისტრი;
  • 2015 წლიდან — საქართველოს სახელმწიფო უსაფრთხოების სამსახურის უფროსი. სახელმწიფო უსაფრთხოების გენერალ-ლეიტენანტი.

ღარიბაშვილი ერთხელ უკვე იყო არათუ მინისტრთა კაბინეტის შემადგენლობაში, არამედ პრემიერიც. შს მინისტრად მუშაობის დროს მან ფარულად ჩაწერილი ადამიანების პირადი ცხოვრების კადრების ნაწილი ჟურნალისტებს აჩვენა.

ღარიბაშვილის სამუშაო გამოცდილება:

  • 2004-200წწ. — შპს ბურჯის(ქართუ-ჯგუფი) ლოჯისტიკის დეპარტამენტის საგარეო შესყიდვების განყოფილების მენეჯერი;
  • 2005 წელს — შპს ბურჯის(ქართუ-ჯგუფი) ლოჯისტიკის დეპარტამენტის დირექტორის მოადგილე;
  • 2005-2008წწ. — სს "ქართუ ჯგუფის" პრეზიდენტის თანაშემწე;
  • 2006 წელს — საქართველოში სან-მარინოს რესპუბლიკის საპატიო კონსულის პირადი წარმომადგენელი;
  • 2009-2012წწ. — შპს(ლეიბლი) "ქართული ოცნების" დირექტორი;
  • 2012-2013წწ. — საქართველოს შინაგან საქმეთა მინისტრი;
  • 2013-2015წწ. — საქართველოს პრემიერ-მინისტრი.