გარდაიცვალა 16 წლის მოზარდი, რომლის მდგომარეობაც რეანომობილის გაუმართაობის გამო დამძიმდა. ამის შესახებ ინფორმაცია On.ge-ს ქუთაისის ინტერვენციური მედიცინის ცენტრში დაუდასტურეს.

მოზარდი შეუძლოდ რაჭის ერთ-ერთ სოფელში გახდა, სადაც ის დასასვენებლად იმყოფებოდა. ვინაიდან რაჭაში რეანომობილები არ არის, მანქანა მის გადასაყვანად ლენტეხიდან წამოვიდა, რასაც რამდენიმე საათი დასჭირდა. გზაში დამატებითი პრობლემა შეიქმნა რეანომობილის გაუმართაობის გამო. ბიჭის მდგომარეობა გზაში დამძიმდა.

რეანომობილის გაუმართაობა დაადასტურა საქართველოს ჯანდაცვის სამინისტროს სამედიცინო საქმიანობის სახელმწიფო რეგულირების სააგენტომაც.

"პირველადი მოკვლევით გამოვლინდა, რომ კატასტროფის ეკიპაჟის მანქანას ჰქონდა გარკვეული ხარვეზები. კერძოდ, სრულყოფილად ვერ ხდებოდა პაციენტის აპარატურული უზრუნველყოფა, რაზეც სააგენტო შესაბამის ღონისძიებებს გაატარებს", — ნათქვამია მათ მიერ გავრცელებულ განცხადებაში.

ამ შემთხვევის შემდეგ შეიქმნა პეტიცია, რომლითაც მოქალაქეები რაჭაში რეანომობილს ითხოვდნენ. პეტიციის ავტორის ცნობით, კატასტროფის ჯგუფის არყოლის გამო პრობლემები ექმნება ადამიანის სიცოცხლეს.