ნინოწმინდის საკრებულოში ქართული ოცნების დეპუტატი, ვრეჟ მურადიანი, რომელიც ფეისბუქლაივში ეფექტებით გავიდა, ამბობს, რომ ლაივში გასვლის დროს "თითი რაღაცაზე დაეჭირა". ამის შესახებ მან ადგილობრივ გამოცემა სამხრეთის კარიბჭეს უთხრა.

"სულ შემთხვევით, ჩართვის დროს თითი რაღაცაზე მომიხვდა. ინგლისურად ეწერა რაღაც, ვერც მივხვდი, რა მოხდა, ჩემს შვილს დავურეკე. საერთოდაც მეგონა სხვა ვინმე რამეს მიკეთებდა და მითხრა, ეტყობა ხელი მოგიხვდაო. შევრცხვი, მასწავლებელიც ვარ, ჩემი მოსწავლეები რას იფიქრებენ, ეს ხომ მართლა შემთხვევით დამემართა", — ამბობს დეპუტატი.

გუშინ, 28 აგვისტოს გამოცემა ნეტგაზეთმა გაავრცელა ინფორმაცია, რომ საკრებულოს დეპუტატი გზის სარეაბილიტაციო სამუშაოების ჩვენების მიზნით ლაივში გავიდა. თუმცა, ვიდეოში მას ფეისბუქეფექტები ჩაერთო. ამის გამო ყურადღება დეპუტატმა მიიქცია. მათი ცნობით, ვიდეო მან 26 აგვისტოს გაუშვა. ამ დროისთვის, ფეისბუქლაივი არ იძებნება.