ოკუპირებულ აფხაზეთში დე ფაქტო საპრეზიდენტო არჩევნების მეორე ტური გაიმართება. მეორე ტურში ერთმანეთს მოქმედი დე ფაქტო პრეზიდენტი, რაულ ხაჯიმბა და ოპოზიციონერი ალხას კვიცინია შეხვდებიან.

აფხაზეთში არჩევნები 25 აგვისტოს გაიმართა. პირველ ტურში ხაჯიმბამ 26,6 პროცენტი, ხოლო კვიცინიამ 24,6 პროცენტი მიიღო. ადგილობრივი დე ფაქტო კანონის მიხედვით, მეორე ტური ორ კვირაში უნდა ჩატარდეს.

საქართველოს საგარეო საქმეთა სამინისტრო ოკუპირებულ აფხაზეთის რეგიონში ე.წ. საპრეზიდენტო არჩევნების ჩატარებას აფასებს, როგორც საქართველოს სუვერენიტეტისა და ტერიტორიული მთლიანობის წინააღმდეგ მიმართულ მორიგ უკანონო ქმედებას.

საგარეო საქმეთა სამინისტრო მოუწოდებს რუსეთს, პატივი სცეს ნაკისრ საერთაშორისო ვალდებულებებს, შეასრულოს 2008 წლის 12 აგვისტოს ევროკავშირის შუამავლობით დადებული ცეცხლის შეწყვეტის შეთანხმება და შეცვალოს უკანონო გადაწყვეტილება.