რუსთავი 2-ის ყოფილი გენერალური დირექტორი, ნიკა გვარამია არხის სახეებზე გაცემული ბონუსების საკითხზე, პაატა სალიას დაანონსებულ სარჩელს ეხმაურება.

"ნოდარ მელაძეს, გიორგი გაბუნიას, ზალიკო უდუმაშვილს და გიორგი ლაფერაშვილს, ჩემი არხის და ზოგადად, მთელი ქართული ტელევიზიის, მთავარ სახეებს ასჯერ რომ განმეორდეს, ასივეჯერ იმავე ბონუსებს დავურიგებდი. მით უფრო, რომ ყველა ნადირობდა ჩვენს სახეებზე და მათ შენარჩუნებაზე მნიშვნელოვანი ამოცანა არ გვქონია", — წერს გვარამია ფეისბუქის გვერდზე.

გვარამია აცხადებს, რომ კერძო ტელევიზიის დირექტორი ვისზე რა ბონუსს გასცემს, დამფუძნებლების თანხმობით, არავის საქმე არ არის. მისივე თქმით, საკადრო ცვლილებების მიზანია, გაუშვას არასასურველი თანამშრომლები და მიზეზი მისცეს "ვითომ პრინციპულებს", "სამართლიანი ბრაზისთვის".

რუსთავი 2-ის გენერალური დირექტორის, პაატა სალიას თქმით, იგი სამოქალაქო სარჩელს ამზადებს ტელეკომპანიის თანამშრომლების გიორგი გაბუნიას, გიორგი ლაფერაშვილის, ნოდარ მელაძისა და, ასევე, ინტერმედია პლუსის ერთ-ერთი მეწილის, კახაბერ ანჯაფარიძის წინააღმდეგ. პაატა სალიას განცხადებით, მათი გათავისუფლება გამოწვეულია ფინანსური საკითხიდან გამომდინარე.

"ჩვენი შეფასებით, დადებულია თვალთმაქცური გარიგებები სარეკლამო კომპანიასთან, ამ შემთხვევაში ინტერმედია პლუსთან, საიდანაც ის მოგება, რომელიც უნდა მიეღო 2015 წელს ტელევიზიას, მოხვდა სხვა კომპანიაში", — თქვა პაატა სალიამ.

რუსთავი 2-ის გადაფორმებიდან ერთი თვის თავზე ახალმა დირექტორმა, პაატა სალიამ საინფორმაციო სამსახურის უფროსი, ნოდარ მელაძე სამსახურიდან გაათავისუფლა. მანვე აღნიშნა, რომ არხიდან ათავისუფლებს სხვა თანამშრომლებს, გიორგი გაბუნიას, ეკა კვესიტაძეს, გიორგი ლაფერაშვილსა და ნანუკა ჟორჟოლიანს. სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

გაიგეთ მეტი ჟურნალისტების გათავისუფლების მიზეზებზე: