გამარჯვებული საქართველოს ინფორმაციით, სამხარაულის ექსპერტიზის ბიურომ მიიჩნია, რომ მათი ლიდერის, ირაკლი ოქრუაშვილის მიერ რუსთავი 2-ის საქმეზე გაფორმებულ ხელშეკრულებაში არხის ახლანდელი მფლობელის, ქიბარ ხალვაშის ხელმოწერა არ არის. ამის შესახებ პარტიაში ბრიფინგი გაიმართა.

"ძალიან ზედაპირულად ექსპერტი წერს, რომ ასო "ვ" და "შ" თავისი დახრილობით და ნიუანსებით არ არის ისეთი, როგორიც ქიბარ ხალვაშს აქვს ექსპერიმენტულ ნიმუშებში. ეს იძლევა, თურმე, კატეგორიული დასკვნის გაკეთების საშუალებას, რომ ეს ხელმოწერა ხალვაშის მიერ არ არის შესრულებული", — განაცხადა გამარჯვებული საქართველოს წევრმა, კოტე კემულარიამ.

რუსთავი 2-ის საქმეზე სტრასბურგის სასამართლოს გადაწყვეტილების გამოცხადებიდან მალევე ირაკლი ოქრუაშვილმა არხთან დაკავშირებით სასამართლო დავა დაიწყო. მან თქვა, რომ ტელევიზიის 100%-იანი წილის მფლობელი თავადაა, ქიბარ ხალვაში, რომელმაც წილები გადაიფორმა, კი ნომინალური ფიგურა იყო. მისივე განცხადებით, აქვს დოკუმენტი, რომელიც ამ ინფორმაციას ადასტურებს და რომელსაც ხელს ქიბარ ხალვაში აწერს.