ევროკავშირის საბჭომ საქართველოსთვის სავიზო ლიბერალიზაციის შესახებ ელჩების შეთანხმების შემდეგ, ოფიციალური განცხადება გამოაქვეყნა.

საბჭოს განცხადებაში წერია, რომ 2016 წლის 5 ოქტომბერს, ევროკავშირის წევრი ქვეყნების მუდმივი წარმომადგენლები (Coreper), საბჭოს სახელით შეთანხმდნენ საქართველოსთვის სავიზო ლიბერალიზაციის მინიჭების საკითხზე. შეთანხმების თანახმად, საქართველოს მოქალაქეებს შეეძლებათ, რომ შენგენის ტერიტორიაზე ვიზის გარეშე გაემგზავრნონ და ნებისმიერ 180-დღიან პერიოდში, 90 დღით გაჩერდნენ. იგივე უფლებით ისარგებლებენ ევროკავშირის მოქალაქეები საქართველოში.

საბჭოს მიაჩნია, რომ შეთანხმება ძალაში მაშინ შევა, როდესაც ახალი შეჩერების მექანიზმი ამოქმედდება.

მანდატის საფუძველზე, სლოვაკეთის წარმომადგენლობის ხელმძღვანელი ევროპარლამენტთან მოლაპარაკებას დაიწყებს.

სლოვაკეთის მუდმივმა წარმომადგენელმა ევროკავშირში, პიტერ იავორჩიკმა განაცხადა, რომ დღეს საბჭომ საქართველოსთვის უვიზო მიმოსვლის მყარი ვალდებულება წარმოაჩინა, იმის გათვალისწინებით, რომ საქართველოში რეფორმები გატარდა:

"სლოვაკეთის ხელმძღვანელობას სჯერა, რომ ქვეყანაში გატარებული რეფორმები უნდა წახალისდეს. ჩვენ იმედი გვაქვს, რომ ევროპარლამენტის მხარდაჭერა საბოლოოდ მიმდინარე პროცესს დაუკავშირდება და საქართველოს მოქალაქეები უვიზოდ მოგზაურობით რაც შეიძლება მალე ისიამოვნებენ".