სექტემბრიდან ნანუკა ჟორჟოლიანის შოუ ეთერში აღარ გავა. ჟორჟოლიანი რუსთავი 2-ზე ახალ სოციალურ გადაცემას წაიყვანს. ამის შესახებ ინფორმაცია თავდაპირველად პრაიმტაიმმა გაავრცელა.

On.ge გადაცემის ფორმატთან დაკავშირებით წამყვანს ესაუბრა. ჟორჟოლიანი ამბობს, რომ ფორმატის შეცვლა 4 თვის წინ გადაწყდა. მისივე თქმით, რუსთაველზე მიმდინარე აქციებიდან პირდაპირი ჩართვები ახალი ფორმატის დატესტვა იყო. ჟორჟოლიანი ამბობს, რომ ახალი გადაცემა სოციალური ტოქ-შოუ იქნება.

"[აქციებიდან] პირდაპირ ეთერშიც გავიდა ნანუკას შოუ, ნელ-ნელა შევდიოდით მაგ ფორმატში. სექტემბერში 10 წლის ხდება ნანუკას შოუ, რაც ნიშნავს იმას, რომ ერთი მთავარი ეტაპი დაასრულა გადაცემამ... ახალი ფორმატი შეთანხმებულია, ასეთი დიდი ფორმატის სოციალური შოუ რუსთავი 2-ს არ აქვს", — ამბობს ჟორჟოლიანი.

მისივე თქმით, გადაცემის ფორმატთან დაკავშირებით ინფორმირებულია არხის გენერალური დირექტორი, პაატა სალია. მისი განცხადებით, ახალ სტუდიაზე ფინანსური პრობლემების გამო, სალიას უნდა ესაუბროს. ჟორჟოლიანი ვარაუდობს, რომ ახალი გადაცემა ეთერში სექტემბრის მეორე კვირიდან გავა.